محمد هاشم همدم
قرا کییگین قطغن؛
بوگون (یک‌شنبه ۱۲ ثور ۱۴۰۰-هجری/۲ می ۲۰۲۱-میلادی/ ۱۹ رمضان ۱۴۴۲-قمری ییل) تخارنینگ صادق فرزندی، تورکلرنینگ ته‌ینچ تاغی رحمتلی آمر پیریمقل قومندان‌نینگ شهادت جامینی ایچیب، اجل پیکی‌گه لبک دیگن کونی دیر.
آمر پیریمقل ییگیرمه یاشیدناق دین، وطن، ملت، تیل و تاریخی‌گه حامی‌لیک قیلیش نیتی‌ده قورالگه قول اوزاتگن قهرمانلریمیزدن بیری ایدی. او، روس اشغالی‌گه قرشی تورکستان و قطغن ییگیتلری قطاریده الله دینی و ملی نوامیس اوچون خالصانه جهادگه چیقیب، اون ییل اشغال دوریده قطغن توپراغلریده پامیر تاغلری کولنکه‌سی کبی تینیم‌سیز کوره‌شیب و اوندن کیین، پاکستان اشغالچی گروهی (طالبان) قرا ریژیمی‌گه قرشی کوره‌شیشدن چیکیلمه‌گن شخصیت ایدی.
شهید ضیایی، موقت و انتقالی حکومت دوریده (۱۳۸۱-۱۳۸۴) اونملی رول اوینه‌گن ملی شخصیتلر قطاریده، ملتی‌نینگ بارلیکلریدن جوده یخشی شکلده حمایوی نقش اوینه‌گن، لویه جرگه و شو قبیل ملت و تیل حیاتی‌گه تاثیرچن ییغینلرده صلابتلی کیریشلر قیلگن و اوندن سونگ تخار خلقی‌نینگ تمثیل ایتیش نیتی‌ده پارلمان اون بیشینچی دور وکیلی بولیب ۱۳۸۸ گچه تخارلیکلرگه مرکزده بولیب خدمت کورستگن ایدی. کیینچه‌لیک (ایندی پارلمان بیزنی ایمس، اوقیمیشلی ییگیتلرنیکی دیگن فکرده) تخارگه قیتیب، خلقی‌گه قرشی تحرکلر آلدینی آلیش اوچون دائمی فعالیتلری بیلن سونگی اون- اون ایککی ییل منطقه‌یی دشمنلر کوزیگه تیکان بولگن ایدی.
شهید آمر پیریمقل ضیایی، (پامیرنینگ آسمان اوپر و ایگیلمس تاغی) دیک دشمنگه اوز صلابتینی کورسه‌تیشدن هیچ قچان چرچمه‌دی. بوگونگچه ایچکی و تشقی (متعصب قوم‌پرست فاشیستلر و پاکستان استخباراتی بوزغونچلریگه) بویوک بیر توسیق بولیب کیلماقده ایدی. دشمنلریگه کتته تشویش یره‌تیب لرزه‌گه سالگن شهید ضیایی ینه ملت و توپراغیدن حمایه ایتیش اوچون طالبانگه قرشی تخار ولایتی روستاق تومنی‌نینگ قرلوق محله‌سی کوکتابه قیشلاغی‌ده یوز بیرگن اوروشنی باستیرگنی بارگن بیر پیتده شهادتنی قبول قیلیب الله رحمتی‌گه قاوشگن.
حقیقتن قومندان ضیایی قورقمس و باتور انسان ایدی، رحمتلی جهاد دوریده شهید احمدشاه مسعود و شهید استاد ربانی بیلن یقین علاقه‌ده بولیب، جهاد دوریده تاثیرچن فعالیتلری بیلن ملتی و وطنی‌گه خدمت کورستگن ایدی. اوندن سونگره‌کی دوره‌لرده ایسه مارشال عبدالرشید دوستم بیلن یقین علاقه‌ده بولیب، جنبش حزبی‌نینگ بویوک شخصیتی اوله‌راق، ملتیمیزنینگ باتور بیر فرزندی صفتیده هیچ قچان کوره‌شدن چیکیلمه‌دی و هرگز وطنینی دشمنلریگه تاپشیرمه‌دی، بلکه شهیدلیکنی قبول قیلگینچه گچه ملتینی یانیده توریب، توپراغی و نوامیسی‌گه مدافع‌لیک قیلدی.
شهید آمر پیریمقل ضیایی‌نی باشقه قومندانلردن فرقی روشنگرلیک و عایله‌سی، اینیقسه اولادلری تحصیلیگه دقت ایتگنی دیر. اونینگ فرزندلری عالی تحصیلات قیلیب جامعه گه تقدیم اینیلگنی انیق دیر.
تینی تینچ، یاتگن ییری اوچماق و خاطره‌لری منگو قالسین آمین
انا لله و انا الیه راجعون
