محمد یحی حفیظی جوزجانی
اوزبیک تیلی
شانه سی ییرکورمه کان هیچ بیرزمان اوزبیک تیلی
اوشبو باتور پهلوان وقهرمان اوزبیک تیلی
نی اوچون سیومی دیکیل جان وتنیم بیرلان سنینگ
ای منینگ جسمیم ارا روح وروان اوزبیک تیلی
نی اوچون وصفینگنی بلبل دیک ترنم ایله می
مینگه سین باغ سن بهار سن بوستان اوزبیک تیلی
جان ودل دین مین سنی حرمت قیلورمن سوزلرینگ
چونکه تنگری مینگه بیرگان بوزبان اوزبیک تیلی
آنه تیل نینگ جان ودل بیرلان سیوب اسرنگ انینگ
کیتمه سون قولدین یوقالیب هیچقچان اوزبیک تیلی
تیل بیلان دین ایککی سی فرضدور بشر اولادیگه
خاصه اول هم جانه جان بیز خاندان اوزبیک تیلی
قیسی تیل بیرلان سنینگ وصفینگنی مین قیلسام بیان
شونگه حیران من بوکون ای جانه جان اوزبیک تیلی
بی عمریازگان بیلان وصفینگ سنینگ بولمس ادا
شونچه دستانینگ ایرور با فرو شان اوزبیک تیلی
یشنه سون باغ وبهاروگلشنینگ تا بر ابد
بولمه سون تا عمرباد یارب خزان اوزبیک تیلی
تا جهان باریچه یارب یشنه سون عمرینگ سنینگ
کورما یین هرگز زوالینگ جانه جان اوزبیک تیلی
قدرت وکوچینگنی کورگان خمسه ده خلق جهان
حاجت ایرماسدورسنگا شرح وبیان اوزبیک تیلی
روس مویا جرمن ویا کیم انگلیس بیرلان عرب
سینگه تینگ کیلماس انینگ بیل هیچقچان اوزبیک تیلی
بیرگینه اوزبیک اولوسیگه ایماس سن مهربان
برچه ملت که ایرور سن مهربان اوزبیک تیلی
لطفی وسکاکی دیک فرزانه لاردین اوشبو کون
بیز گه قالگان سن میراث وهم نشان اوزبیک تیلی
سینگه یوقدوراوشبو آچون ایچره گربیلسانگ زوال
ای همایون اکبرو شاه جهان اوزبیک تیلی
سین بیلان پنجه بیرالماس یاولرینگ هیچ بیر زمان
چون ایرور سن صاحب گرز وسنان اوزبیک تیلی
ایندی سینگه فخر قیلمای کیم گه قیلسام بیلمادیم
کیتتی شان وشوکتینگ تا کهکشان اوزبیک تیلی
کورقیلوربیرگن سوتینگ بیرلان نا نینگنی حرمتی
قیمت وقدر وبهانگنی بیلمه گان اوزبیک تیلی
سینگه قرشی تیل یوقالسون ریشه وبنیادیدین
قالمسون اندین علایم ونشان اوزبیک تیلی
ملتی که بولمه سه اوزتیلی گه حاکم انینگ
اولگه نی کوپ یخشی دور اوشبو زمان اوزبیک تیلی
آنه تیل گه سوزله ماقدین عار ایتاردور وادریغ
نیچه بیر وجدانی اولگان خاندان اوزبیک تیلی
زره جانیگه انینگ گر بولسه وجدان دن نشان
آنه تیل نینگ اول اونوتماس هیچقچان اوزبیک تیلی
قرن لر ایردینگ غنیم لار نینگ ایاغین تا گیده
کم جفانی چیکمادینگ ای جانه جان اوزبیک تیلی
اوشبو قهر واستم وجبروزماننینگ قولیدین
بولگان ایردی رنگ وروینگ زعفران اوزبیک تیلی
شونچه توهین شونچه تحقیرلر بیلان یاولرگه سین
بولمدینگ تسلیم الار گه هیچقچان اوزبیک تیلی
قنچه اوغلا نینگ سنینگ یولینگه قربانلیک بو گان
فطرت واولانی لار دیک قهرمان اوزبیک تیلی
شونچه ینچیل گان بیلان قندی قالیب سن سین تیریک
شونگه حیران دور بو کون خلق جهان اوزبیک تیلی
کوپ یمان کونلرنی اوتکاز دین باشینگدین وادریغ
کورمه گن کونلرنی کوردینگ قهرمان اوزبیک تیلی
قنچه آتینگ گه تجارت قیلدیلر سین بی خبر
بیر گروه فتنه ای آخر زمان اوزبیک تیلی
بی اجل اولدیم دیگیل چون قالمشینگدور در گمان
توشسانگ ارباب لر قولیگه هر زمان اوزبیک تیلی
ینگی اویغاندی عزیزفرزندلرینگ اویقوسیدن
آچتی کوزینی شکر پیروجوان اوزبیک تیلی
شونچه ایل فرزند لرینگ گه بولسه ایردی عقل وهوش
بولمس ایردینگ مونچه پسمان جهان اوزبیک تیلی
بیر عمر چیکتینگ فاشیستلر قولیدین رنج وعذاب
ایمدی راحت یشنه گیل تا بار جهان اوزبیک تیلی
سرو ینگلیغ قامتینگنی ایمدی توتگیل استوار
قیته دین بولدینگ ییگیت ونو جوان اوزبیک تیلی
تا توانینگ باریچه شعرو ادب بوستانیده
ایمدی بلبل دیک یورای بیر سیره بان اوزبیک تیلی
کیلدی دورینگ بیرله دورانینگ سنینگ قیتیب اینه
غم ایما گیل اوشبو عصرو بو زمان اوزبیک تیلی
ایمدی قالماسن بو احوال وپریشانلیک که سین
قیلمگیل بوندین بویان بغرینگنی قان اوزبیک تیلی
سین گزند روزگاردین در امان سن بی گمان
چونکه قصرینگدور سنینگ دارالالمان اوزبیک تیلی
ایمدی هر ییل بیرمینگ آلگای سنینگ فرزند لرینگ
اوشبو توران یورتی ده با فرو شان اوزبیک تیلی
تنگری دین دایم دعایم شول ایرور هرتون وکون
یشنه گیل ای حضرت صاحبقران اوزبیک تیلی
ینگی دهلی
۱۰ قوس ۱۳۹۹ ییل
