راجی قالمس: دهرايچره بينوا انسان ني كورديم ييغله ديم
نورالله راجي قالمس تخارلیک شاعر
حاجي عبدالله اوغلي نورالله راجي قالمس 1348 ييلي تخار مركزي تالقان نينگ سراي سنگ تومنيده توغيليب اوسدي. قالمس باشلنغيچ تعليماتلريني سراي سنگ ليسه سيده بيتيردي. اما مملكتده روي بيرگن انقلاب سبب راجي باشقه تحصلاتلريني دوام ايتديريشگه موفق بولمه ي، خصوصي روشده تعليم كوره باشله دي. او شو جريانده قرآن كريم حفظ قيليب، صرف و نحو، فقه، تفسير، منطق، معاني و بديع كتابلريني هم اوقيب ملكه آشيردي.
راجي كيينگي ييللر تخار معلم تربيه لش موسسه سيده تاريخ بوييچه تحصيل قيلدي. او حج زيارتي اوچون سعودي عربستانگه سفر قيليب، او ييرده حج فريضه سيني ادا قيليش يانيده، امام بخاري مدرسه سيده بير ييلدن آرتيق مدت ايچيده، مدرسه طلبه لريني تدريس قيلدي.
راجي قالمس عربستانده اوزي نينگ “گپلر بابه سي” ناميده گي ايلك اثريني بيتكزگدي. اما اوني چاپ ايتيشگه امكان تاپه آلمه دي.
او خلق سيور بير شاعر، شعرلريده هم انسانلرنينگ ناخوش وضعيتلري دن قيغوره دي.
دهرايچره بينوا انسان ني كورديم ييغله ديم جاده لرني يانيده قالگان ني كورديم ييغله ديم
شرحه شرحه باش اياغي مكتبي گل باله لر آه خبرده محشر بغلان ني كورديم ييغله ديم
قوليدن چولاق اياغ آقساق، توبره بويني ده كمبغل ليكدن يمان تيرگان ني كورديم ييغله ديم
او حياتي دواميده انسانلرگه حرمت قيليش و بيراوني كونگليني آغريتمسليككه قرارقيلگن.
راجي بوگونگي كونده سراي سنگ باله لر ليسه سي ني آمر صفتيده باشقريب كيلماقده
اونينگ شعري نمونه لريدن:
عالمگير ييگيت
علم اوچون بيلينگني باغله شيرييگيت اتفاق ايستب يقين كيل اير ييگيت
اتفاق و اتحاد سيزگه قورنچ بير بولينگ چون حلقه زنجير ييگيت
علم وعرفاندن توليب بابركبي بابا لار ينگ ديك بول عالمگير ييگيت
اختلافني آرقه گه قويوب اونوت لطف ايلب بيزگه سين قول بير ييگيت
بي گمان تقديريني اوزي يازر كيم كه بولسه جوده با تدبير ييگيت
خدمت اوچون بيلني محكم باله بان بو وطن ني ايله سين تعمير ييگيت
معرفت يوليده تعجيل يخشي راق اشبو حقده ايله مه تاخير ييگيت
تون وكون تينماي اوقوبان علم وفن انفس وعالمني قيل تسخير ييگيت
تيمور ميرزا اولوغبيك روحيني شاد ايله تاريخ قيليب تحرير ييگيت
قيل قناعت بو جهان هيچ راجيا نرسه بولسه طالع وتقدير ييگيت
گوزه ل عنوان معلم
مكتب باله لريگه اينگ مهربان معلم معارف قاموسيده گوزل عنوان معلم
يعني اولوغ يولينگا فخر قيلگن محمد جهالت قرشي سيده مهرتابان معلم
آيليگي جوده آز دير اماعذابي بيحد ايمصدر قناعت علم ووجدان معلم
ابن سينا سنايي فارابي ونوايي شهرت قازاندي سيندن بحر عرفان معلم
فيساغورث و اديسون قوچاغينگه توغيلگن دنياگه هديه بير گن ابوريحان معلم
ويكتورهوگو انشتاين علمينگدن آلدي بهره مولانا راهنماسي فخر دوران معلم
حرمت قيليب هميشه راجي مقداريني بيل عالمني علمي بيرله قيلگن حيران معلم
