ضیاء خواجه منصوری افغانستانده خلق‌لر دوست‌لیگی اوچون فعال خذمت قیلگن اوستاذ صنعتکـارلریدن دیــر. او ۱۹۲۰ نـچـی مـیـلادی یـیـلده تاشکند شهریده توغیلدی. باشلنغیچ تعلیمنی توگه‌تیب، موسیقه کــورسـیـنـی هـم عـیـن شـو ییـرده تـوگـه‌تـدی. بـو کورسده دوتار و سیتار چَلیشنی اورگه‌ندی. میلادی ۱۹۲۹-۱۹۳۰ ییللرده فاریاب، مزارشریف، سونگره کابل‌ده عمر کیچیردی. صنعتکار افغانستانده استقامت قیله‌یاتگن اوزبیک، ترکمن، تاجیک، پشتون و هزاره‌لرنینگ، اینیقسه، یاش‌لرنینگ ارداقلی صحبتداشی و صمیمی دوستی ایدی.
منصوری نینگ افغانستان اوزبیکلری تیلی و موسیقه‌سی رواجی اوچون قیلگن خذمتلری غایت اولکن. او اوز اوغیل- قیزلری و نیوره‌لریدن تشقری جودده کوپ ترقی‌پرور یاش‌لرنی افغانستانلیک اوزبیکلرنینگ ادبیاتی، شعریتی، تیلی و موسیقه‌سیگه محبت روحیده تربیه‌له‌دی. او دوتارنی علیحده شوق و ذوق بیلن چه‌له‌ر ایدی. ضیاء خواجه اکه چه‌لگن دلنشین اوزبیک کلاسیک کویلری افغانستان رادیوسی آرقه‌لی هوا موجلریده همیشه جرنگله ماقده.
ضیاء خواجه منصوری تامانیدن دوتارده زور مهارت بیلن اجرا ایتیلگن «مناجات»، «دلخراج»، «تناور»، «بیات»، «ایسکی تناور»، «راحت» و «صوت مسکین» کبی دلربا کویلر هیچ کیمنی لاقید قالدیرمس ایدی و آدملرنینگ زیبا پرست‌لیک ذوقینی آشیریب، اولرنینگ پاک و نفیس قلبلریگه بیر عالم قوت و مدد بغیشله‌ردی.
کمینه «ایماق» افغانستان رادیوسی محلی پروگراملر اداره‌سیده ایشله‌یاتگن پیتیمده ضیاء خواجه منصوری نینگ دوتار و سیتار اسبابلری بیلن اجرا ایتیلگن کلاسیک کویلرینی ضبط ایتتیرگن ایدیم. بو کویلر ادبی ایشیتتریشلریمیزده دایما فایده‌له‌نیب کیلگن. بو کویلر حاضر هم افغانستان رادیو تلویزیونی نینگ موسیقه آرشیفیده سقلنماقده.
ضیأ خواجه منصوری جهان گذشته، تینیب- تینچمس، سیر غیرت و فعال انسان ایدی. او افغانستان نینگ دییرلی همه ولایتلرینی کیزیب چیققن. هندوستان، ایران، ترکیه، سعودی عربستانی، شورالر اتفاقی، آلمانیه و امریکا کبی خارجی مملکتلرده بولیب، اوشه یورتلرده‌گی خلقلرنی افغانستان نینگ قهرمان، جنگ‌آور، صلح‌دوست و مهمانواز خلقی حیاتی بیلن تنیشتیردی. اینیقسه، اوزبیکستان بیلن افغانستان خلقلری اورته‌سیده‌گی دوستلیک و برادرلیک علاقه‌لرینی یخشی‌له‌شده منصوری نینگ خذمتلری کتته دیر.
منصوری صنعتی‌نی اونینگ فرزندلری دوام ایتتیرماقده. اونینگ اوغیللری و نیوره‌سی تامانیدن ایتیلگن دلنشین قوشیق‌لر افغانستانده‌گی برچه اینی- آغه و برادر ملتلر اوچون ذوق‌بخش و یاقیملی دیر. مشهور صنعتکار، افغانستانده اوزبیک موسیقه‌سی نینگ ترقیاتی گه کتته حصه قوشگن سازنده، اوستاد ضیاء خواجه منصوری اوزاق بیتبلیکدن سونگ میلادی ۱۹۷۹ نچی ییلده تاشکند ده وفات ایتدی. او وفات ایتگن بولسه-ده، براق اونینگ صنعتی و خاطره‌سی صنعت سیورلر قلبیده همیشه برحیات دیر.
سویت اوزبیکستانی صنعتی، ژورنالی ۶ نچی سان ۱۹۸۲ نچی ییل، تاشکند .یازووچی: دُکتور فیض الله ایماق
