رحمتلی ایرگش اوچقون
1957 ییلی افغانستان دن چیقگن گه چه شو آت بیلن هم شعر یازگن.
چاپانداز عشقی
قیده سین ای نازلی یارکوزلری چولپان عاطفه
قیده سین ای جلوه گر،ای شوخ فتان عاطفه
دلربالر سروری ،ای آفتی جان عاطفه
قیده سین ای عشوه گر،آشوبی دوران عاطفه
قیده سین اورکک مرال،رشکِ غزالان عاطفه
کورسه تیب مینگ جلوه لرعقلیمنی باشیمدن آلیب
ایله دینگ نازوکریشمه کوکرگیمگه اوت سالیب
دادو فریاد کیم محبت دشتیده یالغوز قالیب
اورته گه آلدی منی،دردو الم لر قوزغالیب
بیر علاجیم قیلمه سنگ حالیم پریشان عاطفه
دامنی وصلینگ نی قویمم،دربدرلیک لر بیلن
اوچغوسی کونگلوم قوشی،بی بال وپرلیگ لر بیلن
گرچی بار دیر،مینگ خریدار،کرو فرلیک لر بیلن
تَرکِ سودا ایله مم،بی سیم و زر لیک لر بیلن
شاهدِ عشقم دورور ،ییر بیرله آسمان عاطفه
نیچه مینگ باغلرگه کیردیم،گل یوزینگ نی آختریب
هر قیا نرگس نگاهینده کوزینگ نی آختریب
عندلیب لردن سوراب،شیرین سوزینگ نی آختریب
تاپمه دیم دشت و دمن لرده،ایزینگ نی آختریب
قیده سین ای رمز عشق ،ای رازِ پنهان عاطفه
کوکره گیم دورشرحه شرحه ،تیرِ هجرانلر بیلن
دریالر دیک موج اورادور،کوزلریم قانلر بیلن
خسته کونگلوم مضطرب دور،قنچه ارمانلر بیلن
کیل رقیبِ روسیه لر قالسین افغانلر بیلن
کیل بوینگ دن ایله نایین، بیتسین هجران عاطفه
گیل اوزنگیمگه ایاق باسگیل سنی آلیب کیتای
قنجوغمگه گل تافیب ،بلخ وبدخشان دن اوتای
اُون سالیب
(اوچقون) کبی،توران ایلینی اویغاتای
اوق آتیب اوغلاق چاپیپ،تویلر تماشالر ایتای
کیل قورایلیک ایکی میز بیر باشقه دوران عاطفه
ایرگش اوچقون
10.10.1986
کونگلوم
یقیلمیش کاخِ آمالیم ،عجب ویرانه دور کونگلوم
میِ صبریم توکنمیش،نِی هزین میخانه دورکونگلوم
قالیب صحرای غمده،اورته نیر آه وفغان ایچره
پریشان زار وحیران،بی سرو سامانه دور کونگلوم
نصیحت کار قیلمس،غیرتینگ بیهوده دور زاهد
توزلمس تیلبه دور،هم عقلی دن بیگانه دور کونگلوم
غم و قیغو کدرلر،اضطراب لرنینگ گذرگاهی
بوتون درد وبلا لرگه مسافر خانه دور کونگلوم
وفاسیز یارنینگ عشقی کومولگن دور ضمیریمده
مقدس مقبرِ اسرار اولوغ کاشانه دور کونگلوم
ریا و رشک دین خالی، وفا وصدق ایله مملو
صفالیک ایچره تینگی یوق،اصیل دُردانه دورکونگلوم
سووق آهم نی کورگچ،سوزیشی قلبدن دیمنگ محروم
تعا لللا ، جهنم آتشی دیک یانه دور کونگلوم
کیرک مس،مجلس ایچره،ساقیا آب ِ عنب چندان
صبوحی فرقتینگدن، دایما مستانه دور کونگلوم
طواف ایتسه کوینگ نی ،گاه وبیگاه ،عیب ایمس عاشق
جمالینگ شمعی گه،آشفته بیر پروانه دور کونگلوم
اوچر عقل وفِراست،گلخنی روحیم دن
(اوچقون) دیک
قسم بِلّا که سن سیز اوزیگه بیگانه دور کونگلوم
ایرگش اوچقون
01.07.1971Gepost door ایرگش اوچقون op 11:10
