مین قهرمان اوزبیک من

0
174

شرعی جوزجانی

مین قهرمان اوزبیکمن!

مین اولوغ کایناتده یره لگن بیرانسان من

انسان عظمتیگه چین دلدن ایشانگان من

بغری کینگ من بو بابده یگانۀ دوران من

حیات سناولریدن یینگیلمسدن اوتکان من

یاولرگه تن بیرمگن، مین قهرمان اوزبیک من

مین برچه انسانلرنی تینگ حقوق دیب بیله من

برچه ملیتلرنی چیندن حرمت قیله من

نامرددن اوزاقله شیب، ایرلرگه قوشیله من

ایل گه خاین بولگن نینگ کوکره گینی تیله من

ظلم و ستمگه قرشی مین نافرمان اوزبیک من

مین تاریخ فرزندی من، حر ایرکین توغیلگنمن

ایرکین یشب دنیاده، ایرکینلیکده اولگنمن

گاهی چناردیک اوسیب، گاهی گلدیک سولگنمن

اوروش النگه سیده، گاه کوییب کول بولگنمن

لیکن«ققنُس» دیک اوتدن، تیریک چیققان اوزبیک من(1)

کنیشکا من ترقتگن، شرقده بودا دینینی

آتیلامن تاشیگن، غربگه عیسا دینینی  (2)

گوک تورک ایدیم تنله گن، تنگریسما دینینی

باشقه دینلر سینگری کورگن میترا دینینی

ایندی بوگون کوره سیز، چین مسلمان اوزبیک من

مین اویغورمن، تورکمنمن، آذری من، قازاقمن

قیرغیز، برلاس، تاتارمن، همده قاره قلپاقمن

عثمانلیمن، بیاتمن، مین یاقوتمن، قبچاقمن

چغتایمن، نوغایمن، قزلباشمن، قلماقمن

اولوغ تورک اولوسیدن، قد کوترگان اوزبیکمن

اولوغ بیک من یول آچدیم«زیجیم»بیلن آسمانگه

الفرغانی من قوردیم،«مقیاس النیل»اسوانگه (3)

خوارزمی من اورگتدیم، الگریتم جهانگه

بیرونی من تاشیگن، بیلیمنی هندوستانگه

فیلسوف فارابی من، مین نکته دان اوزبیک من

تیمورمن«اویغانیش» نینگ دوریگه سالگن اساس(4)

علم و فن ساحه سیده یوتوقلریم بی قیاس

علیشیر نوایی من، نازک طبعیم کوب حساس

هیچ کیمسه سالالمیدی اعتقادیمگه وسواس

مین تورکلر بوغونی، صاحبقران اوزبیک من

قبچاق دشتیده یشب اوریسلرنی رام قیلدیم

پراوه سلاو خلقینی، تینچیتیب آرام قیلدیم

دشمنلرنی سینیدیب، کوندوزینی شام قیلدیم

اولوسیم تینچلیگینی تامین عام و تام قیلدیم

آلتین اردو باشلیغی، مین «اوزبیک خان» اوزبیک من

توران و انادولو، مین اوچون بویوک وطن

بویوک آبده لرنی ترکستانده مین قورگن

وطن سیورلیک درسین اولوسلرگه مین بیرگن

دوست و دشمن هر ییرده، غیرتیمنی تن آلگن

معرکه ده دوستم من، مرد میدان اوزبیک من.

عظیمی، نزیهی من، کتته دیوانلریم بار

میمنه لیگ رسام من، ایل  صنعتیمگه اقرار(5)

ایتمیتوف من مینگه،  دنیابیرگن اعتبار

عبدالله عارپوف من، همده عبدالله قهار(6)

مین ایرکین واحدوف من، خلقیم سیوگان اوزبیک من

آسمان بیلن تیلله- شر، کوککه چوزیلگن تاغیم                   هیچ بیر زمان اوچمه گن یانیب تورگن چراغیم                  دایم هیلپیرب تورگن، کورش اوچون بیراغیم                      «حدیقة الاوزبیکیه» مصرده گی باغیم                         «سیف الدین الاوزبیک»(7) من، باغلر قورگان اوزبیک من.

تاریخی گواهلریم«اورخون» بیتیک تاشلری

«توماریس»من تن آلگن اوروپا نقاشلری(8)

عظمتیم شاهدی، توران تاغ و تاشلری

بابرشاه من تنیگن، دنیا قری،  یاشلری

شیخ محمود کاشغری من، یازگن«دیوان» اوزبیک من

مینی تنیمن دیسنگ، آق سراییمگه قره

تاج محل گه یخشی باق، یوکسک جاییمگه قره

اویغور خطینی اوقیب، اوق و یاییمگه قره

معرکه ده کیشنه تیب، مینگن تاییمگه قره

تیگین شاهلر باشلیغی «نیزک ترخان» اوزبیک من

بی بی خانم بجرگن خدمتلری بی تکرار

گوهر شاد بیگیم قورگن بنالر قتار-  قتار

گلبدن بیگیم بیلن، زیب النسا کیمده بار؟

نادره، زلفیه دیک، کیم یازگن گوزل اشعار؟

برچه سی افتخاریم، فخر جهان اوزبیک من

ایندی مستقل لیکده قیته باش کوترگنمن

اوز اولکمنی ایلیمن، معجزه لرگه وطن

    گلچیچکلرگه تولیب، یشنب بارسین بو گلشن

تینچلیک برقرار بولسه، رواجلنر علم و فن

          بو دیا لیتیکه نی، بیلیب آلگان اوزبیکمن                                       ـــــــــــــــــــــــــــــــــــــــــــــــــــــــــــــــــــــــ

    1–    ققنُس: یونان اسطوره سیده اولمس – ییتمس بیرقوش. او مینگ ییل یشه گندن کیین، کوپ اوتونلر توپلب اوستیگه اولتیره دی و تومشوغی اطرافیده گی تیشیکلردن یاقیملی کویلر چیقرگنده اوتین آلاو آلیب اونی کویدریب کول قیله دی. کیین کول نینگ تگیدن بیر ققنس جوجه سی چیقیب یشش گه دوام بیره دی.

 2ـــــــــــ ایریم تاریخی روایتلرگه کوره هونلر حکمداری «آتیلا» اوروپانی ایگللب آلیش مقصدیده کیچیک آسیادن اوتیش زمانی، عیسویت دینیده قسطنطنیه اسقفی نسطوریوس آرقه لی اوزگتیریش کیریتیلگن «نسطوری» تعلیماتینی اوزی بیلن اروپاگه آلیب بارگن ایکن.

3 ــــــــــــ  «مقیاس النیل» عباسیلر خلیفه سی بویروغیگه کوره بغدادده گی«بیت الحکمه»علمی مرکزی نینگ ییریک اعضاسی احمد فرغانی، نیل دریاسی قرغاغیده جایلشگن اسوان منطقه سیده سوو مقدارینی اولچش مقصدیده قورگن کتته جهازدن عبارت. اوشبو جهاز آرقه لی هر ییل دریا سووی مقداری اولچه لیب، سوو مقداریگه قرب ییرلرگه سالیق بیلگی لنردی. نیچه ییل آلدین اوشبو علمی مرکزنی قورگن اوزبیکستانلیک احمد الفرغانی افتخاریگه مرکز یانیده اونینگ کتته هیکلی اورنه تیلدی. آچیلیش مراسمیده حسنی مبارک بیلن اسلام کریموف هم اشتراک ایتگن ایدی.

4 ــــــــــــ تیمور اساس سالگن رنسانس دوری.

 5 – میمنه لیک بویوک رسام پروفیسور غلام محمد میمنگی.

   6 ــــــــــعبدالله قهار اوزبیک بویوک منقد ویازووچیسی.

7-  اوزبیک خلقی هر ییرده یشگن بولسه ، اوشه جایده مدنیت یره تیب یادگارلیکلر قالدیرگن. اولردن بیری الامیرسیف الدین اوزبک الیوسفی مملوکیلر دولتی نینگ اینگ بویوک امیرلریدن  و سلطان قایتبای دوریده کوزگه کورینگن اینگ ییریک سرکرده لردن و مملکت بوییچه دولت مصلحتچیسی ایدی. قاهره شهری یقینیده او یره تگن «حدیقة الأوزبکیه» (اوزبیک باغی) اوز چیرایلیگی، کورکملیگی و مناسب موقعیتی بیلن عصرلرآشه علم و مدنیت ترقلیشی مرکزی بولیب کیلگن. مصرنینگ بیرینچی اوپرا و بلیت تیاتری شو ییرده قوریلگن و ام کلثوم مصر مشهور خواننده سی بیرینچی کنسرتینی شو ییرده اجرا ایتگن. ناپلیون مصرده  تورگن چاغلریده شو باغده گی قصرلردن بیریده یشگن.

8    ـــــــــــ  توماریس:   قدیمی تورکی قوملر – ساکلر ملکه سی. یونان مورخی هیرودوت اوز تاریخیده بو گوزل ملکه، ایران شاهی کوروش عسکرلریگه قندی شکست بیریب اونینگ باشینی کیسیب قاندن توله بیر طشت گه سالیب قویگنی حقیده مفصل معلومات بیرگن. اروپا نقاشلری اونینگ گوزللیگینی تورلی لوحه لرده تصویرلگنلر.

شرعی جوزجانی

پاسخ ترک

Please enter your comment!
Please enter your name here