اندجانده بویوک خاقان ظهیرالدین محمد بابرنینگ توغیلگن کونی نشانلندی
———————————————————————
جمعه کونی 14 فبروری، بویوک خاقان ظهیرالدین محمد بابر نینگ توغیلگن کونی مناسبتی بیلن بابر خلق ارا جماعت فوندی تامانیدن، اندجان شهری مرکزیده بابر هیکلی قد کوترگن کتته میدانده ترتیبگه سالینگن طنطنه لی مراسم بیلن نشانلندی.
مراسمگه ولایت حاکمی، اوزبیکستان یازووچیلر اویوشمه سی رئیسی معاونی، عالم و ادیبلر، افغانستان ایلچی خانه سی قونسلی اکرام الدین مستور، بیرقتار افغانستانلیکلر- عبدالله رویین، رحیم ابراهیم، عزیز الله ارال، خارجدن کیلگن بابر شناسلر، عالی اوقو یورتلری استادلری، حربی و ملکی طلبه لر، جماعت اربابلری و ولایت اهالیسی نینگ تورلی قتلملری اشتراک ایتگن ایدیلر.
مراسم بابر هیکلی آلدیده ولایت حاکمی و ایریم موسسه لر تمانیدن گل چمبرلر قوییلیشی بیلن باشلندی. ولایت حاکمی اوز مضمونلی بیانیه سی بیلن مراسمنی آچیب، اوشبو قوتلوغ مناسبت بیلن برچه نی تبریکله دی و دولت سیاستی اوستیده توختلیب، پریزیدنت شوکت میر ضیایف تمانیدن آلیب باریله یاتگن ترقی پرورریجه لرنینگ اساسی تامانلرینی آچیب بیردی و او اوشبو تدبیرنی تشکیل لشتیرگن بابر خلق ارا جمغرمه سی رئیسی ذاکرجان مشربوف گه تشکر بیلدیردی.
اوندن کیین اوزبیکستان یازووچیلر اویوشمه سی رئیسی اورین باسری غیرت مجیدوف تبریک سوزیدن کیین بابر حقیده یازگن شعرینی اوقیدی.
ایریم شاعرلر و ادیبلر سوزگه چیقیب، اوز شعرلری و بیانیه لری بیلن مراسمگه حصه قوشدیلر. عزیزالله ارال افغانستان و اوزبیکستان دولتلری اره سیده دوستانه سیاست حقیده گپیردی.
محلی ملی چالغو آرکستری یاقیملی کویلر و بابر شعرلری بیلن ایتیله دیگن اشوله لر بیلن مراسمنی قیزیتیب توردی. تورلی مکتبلر یاش اوقووچیلری بابر شعرلرینی دکلامه قیلیب، ایریم غزللرینی اوقیدیلر.
مراسم نینگ علمی – ادبی قسمی بابر نامیده گی 300 هکتار ساحه نی قمرب آلگن بابر باغی ایچیده گی 15 هکتارلی مدنیت و استراحت باغی مرکزیده قوریلگن بابر خلق ارا جمغرمه سی بناسی سالونیده بولیب اوتدی.
ذاکرجان اکه 25 ییل دوامیده 375 مینگ کیلومتر مسافه نی باسیب اوتگن بابر ایکپیدیتسیه سی فعالیتی حقیده معلومات بیریب، اوشبو اوزاق مدتلی سفرلر دوامیده توپلنگن تاریخی و بدیعی اثرلر نتیجه سیده بابر تاریخی موزیمی تیکلنگنی و اوزبیکستان پریزیدنتی یقینلرده بو مرکزنی کینگیتیریب رواجلنتیریش اوچون 10 ملیارد سوم تخصیص بیرگنی حقیده معلومات بیریب بابر قاموسی جاپان تیلیگه ترجمه قیلینیب نشر ایتیلگنی و عرب تیلیگه ترجمه سی توگه تیلیش عرفه سیده ایکنلیگینی ایسله تیب اوتدی.
اوندن کیین قوییده گیلر بابر خلق ارا مکافاتی بیلن تقدیرلندیلر:
– آمنه تاجی بایوا؛
– ابراهیم جان اسقروف؛
– عبدالله رویین؛
– پروفیسورحمیدالله بالته بایف؛
– محمود حسنی؛
– نورعلی قبول؛
بیر قازاغستانلیک عالم و بیولوژی فنلری دوکتوری.
اوندن کیین بیر قتار داخلی و خارجی عالملر سوزگه چیقیب اوز مقاله لری مضمونینی قیسقه چه شکلده بیان ایتدیلر.
مین « فقه و تصوف علمی ترقلیشیده بابریلرنینگ توتگن اورنی» موضوعیده یازگن مقالم خلاصه سینی بیان ایتیب، مخدوم اعظم «رسالهٔ بابریه»نی بابر تمانیدن عبیدالله احرار نینگ «رسالهٔ والدیه» سی اوزبیک تیلیگه قیلینگن منظوم ترجمه سیگه جوابا یازیلگن لیگی حقیده معلومات بیردیم.
عزیزالله ارال قسقه چه سوزدن کیین بیر تسبیح، بیر پاکت زعفران و سرپل اسلوبیده تیکیلگن بیر تاقینی ذاکرجان مشربوف گه تقدیم ایتدی.
جلسه دن کیین مهمانلر بابر جمغرمه سی رستورانیگه توشلیک اوچون دعوت قیلیندیلر. غذا بیلن موزیک، سرود و ادبی صحبتلر دوام ایتدی.
اوزبیکستان 24، مدنیت و معرفت تیلی کاناللری جریاننی آنلاین شکلده ایفیرگه اوزه تردی.
جانلی ایفیرگه اوزه تیله دیگن اوزبیکستان– 24، مدنیت و معرفت تیلی کاناللری بیلن 5 – 6 دقیقه لیک مصاحبه ده بابرنامه نینگ علمی اهمیتی، باشقه تاریخی منبعلردن فرقی و بابرنینگ علمی، ادبی و سیاسی شخصیتی، کابل شهرینی آبادانلشتیریش بوییچه قیلگن خدمتلری و منطقه نینگ جغرافیه سی باره سیده بیرگن عجایب معلوماتلری حقیده صحبت قیلدیم.
ییغیلیش کیچ گه چه دوام ایتدی.
