کوز گورمه گن دوران نی کور!

کوزنی آچ صاحبقران، کوز کورمه گن دوران نی کور
تيکله گن اوز قدينی آزاد ترکستان نی کور

چيقدی ايرکين ليک قوياشی کويديريب ظلمت تونين
مستقل ليک بيزگه بيرگن بو بويوک امکان نی کور

مينگلب انسان بو وطن ده بولدی قربان ايل اوچون
حريت ديب، جاننی بيرگنلردن آققن قان نی کور

بيرگينه “فطرت” ايمس، کيچگن بو يولده جانيدن
“قادری”، “ناصر”، “منور قاری” و “چولپان” نی کور

يير يوزيگه سچره گن سانسيز شهيدلر قانيدن
قبرلر اوزره کوکرگن لالهٔ نعمان نی کور

“معرفت سيزلر؟!” ديديلر بيزنی و “ياووز؟!” سيني
بو يامان تهمت گه باق، بو ناروا بهتان نی کور

قصه ايتور شوکتينگدن “يير يوزی نينگ صيقلی”
تينگله بو حماسه نی، بو مثلسيز داستان نی کور

کوک گه يول آچدی اولوغ بيک “کورگانی زيج” ايله
ييرگه بوی سونگن بو “زيج” ايله بويوک آسمان نی کور

“آق سرای” ايوانی باشدن تيکله نور، سين غم ييمه
يشنگن اولکنگ گه باق، اونده سرو سامان نی کور

سينديريب دشمن طلسمين باش کوتردی هيکلينگ
حقنی تيکلش يوليده بو حجت و برهان نی کور

اوزبيگينگ قويدی سينگه بو قهرمانليک هيکلين
افتخارينگ تيکله گن بو قهرمان اوغلان نی کور

موزه يينگ کوک گنبذيدن بولدی بير يوکسک نشان
سين اوچون اونده قوريلگن قبه و ايوان نی کور

سين توغيلگن کون نشانلندی جهان مقياسيده
عالم اهليدن بويوک بو حرمت و اذعان نی کور

بيرلشيب ايرکين يشش درسين بيرور “گور امير”
تربتينگدن بيرليک انواری ياغر، لمعان نی کور

خلقنی بيرلشتيرور دايم اولوغ نامينگ ” تيمور”
اولکه نی اسرش يوليده بو تيمير قلقان نی کور

ايندی توران ملکيده خلقينگ بويوک دولت قورور
قول قوييلگن بو مقدس فکر اوچون پيمان نی کور

توزدی اوزبيکلر عدالتگه اساسلنگن توزوم
بيرق و طغراگه باق، مدحيّه و فرمان نی کور

اوچمگی يورتينگده سين ياققن تمدن مشعلی
کوزنی آچ، نورگه چوميلگن مستقل توران نی کور
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صاحبقران تيمورنينگ 660 ييل ليگی مناسبتی بيلن یازیلگن شعر.

ــــــــــــــــــــــــــــــــــــ
1 – قيزيل لاله
2 – سمرقند شهري
3 – اعتراف
4 – سمرقندده امير تيمور حشمتلی مقبره سي
5 – لمعان – پارلش
6 – دولت نشانی
7 – ملی سرود