فاریاب ولایتی میمنه شهریده مدنی نهادلر تشبثی‌ده تورکی خلقلر مدنیت و حاضرگی حالی عنوانی آستیده ییغین اۉتکزگن.
افغانستان تورکي خلقلری مدنیت و حاضرگی وضعیتی نامیده‌گی سۉزله‌شوو دستوری، فاریاب ولایتی‌نینگ مرکزی میمنه شهریده بۉلیب اۉتگن.
مذکور ییغین سه‌شنبه کونی (15- دلو) بیر قنچه نهادلر اشتراکی‌ده یۉلگه قۉییلگنی ایتیلماقده. ییغین‌نینگ اصل تشبث‌کاری «اېزگو اجتماعي-فرهنگي مجله‌سی» و «تورکستان اېللری انجمنی» بۉلیب، «پروفیسورغلام محمد میمنه‌گی اجتماعي-فرهنگي انجمنی» سالونیده، سۉزله‌شوو دستوری صفتی‌ده اۉتکزیلگن.
یاش شاعر و مدنی فعال محبوب‌الله توران اۉز مجازی صحیفه‌سیده یازیشیچه، مذکور سۉزله‌شوو ییغینی‌ده، فاریاب معلم تربیه‌لش مووسسه‌سی‌نینگ باشلیغی استاد احمیدالله عرب، فاریاب بیلیم یورتی‌نینگ اۉزبېک تیلی و ادبیاتی دیپارتمنتی استادی محمد اشرف شریفي، فاریاب بیلیم‌یورتی‌نینگ تاریخ دیپارتمنتی استادی محمد بشیر معصومي و اېکینچی‌لیک فاکولته‌سی‌نینگ باشلیغی استاد حمیدالله اۉزتورک پَنیلده صحبتچیلر صفتی‌ده بۉلیب، افغانستان تورکي خلقلری‌نینگ تاریخ، فرهنگ، رسم و رواجلری، یاشلرنینگ بوگونگی و کېله‌جکده‌گی مهم مسوولیتلری، اولرنینگ حاضرگی علم و تکنولوژی بیلن جهازله‌نیشی، همده افغانستان شرایطی‌ده یاشلر مقابلیده‌گی قیینچی‌لیکلر و اولرنینگ حل اېتیلیش مسئله‌لریده سۉز یوریتگنلر. سۉزله‌شووده اۉنملی نکته‌لرگه اشاره قیلینگنی اشتراکچیلرنینگ علاقه‌لری و قیزیقیشلری بیلن کوتیب آلینگن.
ایتیش کېره‌ک، نېچه کون آلدین افغانستان جمهور رییسی محمداشرف غنی ارگ‌ده اۉتکزیلگن بیر سۉزله‌شو دستوریده، صاحبقران امیر تېمورگه حقارت قیلیش‌گه قۉشیمچه، حاضرگی افغانستان دېب اتلگن توپراغ‌نینگ بوندن مینگ ییل آلدینگی سوو تیزیمینی تورک امپراطورلری بوزیب تشله‌گن دېب ادعا قیلگن اېدی. اونینگ صحبتلرینی قید قیلگن ویدیوده کۉرسه‌تیشیچه، غزنی سوو تیزیمی سلطان علاوالدین غۉری، جنوبی تورکستان ولایتلری‌نینگ سوو تیزیمی چنگیزخان و هلمند و سیستان منطقه‌لری سوو تیزیمی اېسه صاحبقران امیرتېمور کوره‌گان تمانیدن بوزیب تشلنگن دېب ایتیلگن. اما اشرف غنی بوییغینده، بوندن مینگ ییل آلدین سوو تیزیملری کیم تمانیدن قوریلگن اېکنلیگینی ایتمه‌گن.
اشرف غنی‌نینگ بو سۉزلریگه اعتراض بیلدیریب، تشقی مملکتلرده یشه‌یدېگن شاعر و محقق ایشانچ توره (سوو تیزیمی ینگی و معاصر بیر سۉز، بوندن مینگ ییل اول سوو تیزیمی بۉلمه‌گن) دېگن. اونینگ اورغوله‌شیچه اشرف غنی مسوولیت‌سیز سۉزله‌شگن. بونگه قۉشیمچه جناب ایشانچ اشرف غنی تاریخنی بیلمه‌گن بیر انسان اېکنلیگینی تیلگه آلگن.
نېچه کوندن بېری جمهور رییس‌نینگ بو سۉزلری آرتیدن تورکستان ولایتلریده یوکسک ناراضی‌لیکلر بیلدیریلماقده و بوگون اېسه بغلان ولایتی و اندخوی تومنیده خلق یوکسک اعتراض بیلدیریب کېلماقده‌لر.
