قیلمه سانگ بول اولکه ده تا خشم وعصیان اوزبیگیم
کاخ استم بولمه گی بیرزره ویران اوزبیگیم
تورگیل ای بابر نی اوغلی ای علیشیر باله سی
طاقتیم تاق اولدی آخر اوزبیگیم جان اوزبیگیم
اوتتی قولیک عصری بیرله چورلیک دورانه سی
کیلدی ایرکینک زمانی ایمدی اویغان اوزیبگیم
تا بزور دشمنلرینگدین آلمه سنگ حقینگنی سین
سنگه حق بیرمس کیشی بول اولکه ده خان اوزبیگیم
تاکه اوزبختینگگه حاکم بولمه سنگ عالمگه سین
قویمه گیل اوستینگگه هرگز نام انسان اوزبیگیم
کیرمه سان چون ارسلاندیک باش اوریب میدان ارا
یاولرینگ بیرمیدی اصلا سینگه میدان اوزبیگیم
سین اگر جولان ا وریب کیرسانگ گوراش میدانیده
کیل ترالمس سینگه تاب سام ونریمان اوزبیگیم
سین اولوغ افراسیاب نی قهرمان فرزندی سن
سنگه فخرایلر بوکون ایران وتوران اوزیبگیم
غیرتینگ شانینگ ایمسدورحاجت شرح وبیان
اوشبو اوصافینگ ایرور عالمگه دستان اوزبیگیم
ای ابومسلم ایا ببرخراسان باله سی
زنده دور آتینگ بیلن نام خراسان اوزبیگیم
اول زمان غربده یوق ایردی علم ودانش دین نشان
شرق که سین قویدینگاساس علم وعرفان اوزبیگیم
هربیر آتینگنی ایشیت سم جان آلورجسم وتنیم
ای تن وجانیم سنی یولینگده قربان اوزبیگیم
اولگیل وجان بیرگیل اما بیرمه گیل قول لیکه تن
اولگه نینگ کوپ یخشیدور قول لیکدین ای جان اوزبیگیم
یاکه اولگیل یا که اوزبختینگگه تورگیل ایگه بول
ایرته لیکده قالمه سون کونگلینگده آرمان اوزبیگیم.
