اۉزبېکستان تورکي تیللی دولتلر همکارلیک کېنگشی سه‌ممیتیده ایلک بار تۉله حقوقلی اعضا صفتیده اشتراک اېتدی. مملکت اوشبو نفوذلی خلق‌ارا توزیلمه‌گه جاري ییلده قۉشیلدی.
شرعی جوزجانی
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
شوکت میرضیایف: تورکي کېنگشگه اعضالیک خلقیمیز نینگ توب منفعتلریگه تۉله جواب بېره‌دی.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
آذربایجان پایتختی باکوده 15-اکتوبر، سه‌شنبه کونی تورکي تیللی دولتلر همکارلیک کېنگشی نینگ یېتّینچی سه‌ممیتی بۉلیب اۉتدی. بو حقده پرزیدنت مطبوعات خدمتی معلوم قیلدی.
اونده مذکور تشکیلاتگه اعضا مملکتلر — اۉزبېکستان، آذربایجان، تورکيه، قیرغیزستان رهبرلری، قازاغستان نینگ بیرینچی پرزیدنتی نورسولتان نظربایف اشتراک اېتدی. کوزه‌تووچی مملکت صفتیده هنگری(مجارستان) باش وزیری، شونینگدېک، تورکمنستان وزیرلر محکمه‌سی رئیسی اۉرین‌باسری انجمنده قتنه‌شدی.
اۉزبېکستان تورکي تیللی دولتلر همکارلیک کېنگشی سه‌ممیتیده ایلک بار تۉله حقوقلی اعضا صفتیده اشتراک اېتدی. مملکت اوشبو نفوذلی خلق‌ارا توزیلمه‌گه جاري ییلده قۉشیلدی.
بو تشکیلات 2009-ییل 3-اکتوبرده آذربایجان نینگ نخچوان شهریده توزیلگن بۉلیب، دستلب اونگه تورکيه، آذربایجان، قازاغایستان و قیرغیزستان اعضا اېدی.
شوکت میرضیایف 2018-ییل 3-سپتمبر کونی قیرغیزستان نینگ چۉلپان اته شهریده بۉلیب اۉتگن سه‌ممیتده فخري مهمان صفتیده اشتراک اېتدی. جاري ییل 5-اکتوبرده تاشکېنتده تورکي تیللی دولتلر ایش بیلرمانلر کېنگشی مجلسی همده اینوېستیتسيه ( سرمایه گذارلیک) فارومی اۉتکزیلدی.
علاقه‌لر بونده‌ی فعال رواجلنر اېکن، بونی حقوقي جهتدن مستحکملش هم ضرور اېدی. جاري ییل 14-سپتمبرده اۉزبېکستان تورکي تیللی دولتلر همکارلیک کېنگشینی توزیش تۉغریسیده‌گی نخچوان بیتیمینی تصویب قیلدی.
اۉزبېکستان نینگ تورکي تیللی دولتلر همکارلیک کېنگشیگه قۉشیلیشینی برچه اعضا مملکتلر ممنونیت بیلن قبول قیلدی. رسمي شخصلر، اېکسپېرتلر اۉزبېکستانلیکلرنینگ تورکيلر تاریخیده‌گی اۉرنی، بوگونگی صلاحیتی و اهمیتینی اعتراف اېتدی.
شوکت میرضیایف سه‌ممیتده سۉزله‌گن نطقیده اۉزبېکستان نینگ تشکیلاتگه اعضا بۉلیشی طبيعي و تاریخي جریانلر افاده‌سی اېکنینی تأکیدله‌دی.
— تورکي کېنگشگه اعضالیک خلقیمیز نینگ توب منفعتلریگه تۉله جواب بېره‌دی. بوگونگی کونده اۉرته‌میزده نه فقط مدني- معنوي علاقه‌لر، بلکه سودا-اقتصادي مناسبتلر هم ینگی باسقیچگه کۉتریلماقده. آخرگی اوچ ییلده دولتلریمیز نینگ اۉزارا سودا حجمی سَلکم ایکّی برابرگه آشدی، مینگدن آرتیق ینگی قۉشمه شرکتلر آچیلدی. ترانسپورت قتناولری کېنگه‌یماقده، ویزه‌سیز ترتیب اساسیده توریستلر آقیمی تاباره کۉپیماقده، خلقلریمیز نینگ قرداشلیک رشته‌لری مستحکملنماقده، — دېدی دولت رهبری.
شوکت میرضیایف سه‌ممیت کون ترتیبیگه کیریتیلگن مسأله‌لر بۉییچه اۉز فکر و تکلیفلرینی بیلدیردی.
اۉزبېکستان پرزیدنتی تدبیرکارلر اۉرته‌سیده تۉغریدن- تۉغری و ایشانچلی علاقه‌لرنی اۉرنه‌تیش اوچون اېنگ قوله‌ی شرایطلر یره‌تیشنی استوار وظیفه دېب قید اېتدی. شو باره‌ده قۉشمه تېخناپرکلر(صناعت پارکلری)
ستارته‌پ اینناوه‌تسيه کمپنیلری( باشلانغیچ سرمایه یاتقیزیش کمپنیلری) و وېنچور جمغرمه‌لری تشکیل اېتیش، قۉشمه اینوېستیتسيه (سرمایه یاتقیزیش) فوندی و تورکي دولتلر سودا اویلرینی (تجارت اقاقلرینی) بیرگه‌لیکده برپا اېتیش تشبثینی ایلگری سوردی.
شوکت میرضیایف کېنگشگه اعضا مملکتلر اهالیسی نینگ 40 فایزیدن آرتیغی یاشلر اېکنیدن کېلیب چیقیب، اولرنی تدبیرکارلیککه کېنگ جلب اېتیش مقصدیده تورکي کېنگش دایره‌سیده یاش تدبیرکارلر فارومینی تأسیس قیلیش و اونینگ بیرینچی ییغیلیشینی کېلگوسی ییل اۉزبېکستانده اۉتکزیشنی تکلیف قیلدی.
دولت رهبری ییریک ترانسپورت- علاقه لری لایحه‌لرینی عملگه آشیریش آرقه‌لی اروپا، ختای و جَنوبي آسیا بازارلریگه چیقیش، «باکو—تبیلیسی—کرس» ینگی تېمیر یۉلی نینگ صلاحیتیدن اونوملی فایده‌لنیش ضرورلیگینی تأکیدله‌دی. سیاحلیک ساحه‌سیده‌گی همکارلیکنی رواجلنتیریش بۉییچه هم عملي تکلیفلر ایتیلدی.
اۉزبېکستان پرزیدنتی مدني-هومانیتر ساحه‌لر اهمیتیگه علیحده توخته‌لیب، کېنگشگه اعضا دولتلر ادبیاتی نینگ اېنگ سره نمونه‌لریدن عبارت «تورکي ادبیات خزینه‌سی» ناملی کتابلر تورکومینی هر بیر مملکت نینگ آنه تیلیده نشر اېتیشنی تکلیف قیلدی.
شوکت میرضیایف تورکي تیللی دولتلر همکارلیک کېنگشیگه رئیسلیک آذربایجانگه اۉتیشی مناسبتی بیلن الهام علی یف نی قوتلب، موفقیتلر تیله‌دی.
اوچره‌شوو یکونیده تورکي تیللی دولتلر همکارلیک کېنگشی یېتّینچی سه‌ممیتی نینگ دېکلاراسیونسی (اعلامیه سی) و باشقه حجتلر قبول قیلیندی.
تورکي کېنگشگه اعضا دولتلر رهبرلری نینگ اۉزبېکستان نینگ تۉله حقوقلی اعضا صفتیده تشکیلاتگه قۉشیلیشی تۉغریسیده قۉشمه بیاناتی سه‌ممیت نینگ مهم واقعه‌سی بۉلدی.
خبر و فوتولر: پرزیدنت مطبوعات خدمتی
