افغانستان تورکلری مدنی فدراسیونی‌ (ففتا)نینگ ییغینی بولیب اوتدی

0
49

 

افغانستان تورکلری مدنی فدراسیونی‌ (ففتا)نینگ ییغینی بولیب اوتدی مذکور ییغین انترنت ترماقلری (مسنجرگروپ) واسطه‌سی بیلن کیچقورون (۱۳ سپتمبر ۲۰۱۹جمعه آقشامی) اروپا وقتی بیلن ساعت ۷ ده باشلندی. ییغین‌ده ففتانینگ رهبرلیک اعضاسی جمله دن حرمتلی پروفیسور توردیقل میمنگی و یاش اولوغلر باشلیغی حرمتلی جنرال سراج‌الدین قیتمس قوشیمچه، حرمتلی دوکتور محمد عثمان بیلیم، حرمتلی انجنیر نجم‌الدین محمودی، جناب نیک‌محمد مرادی، ففتانینگ وقتینچه‌لیک باشلیغی حرمتلی رحمت‌الله رحیمی پیلوت و هاشم همدم قتنشگن ایدی. ییغین‌نینگ اساسی بحثی: ۱-حاضرگی صادر ایتیلیب تورگن اوروشلردن ملت‌ اینیقسه تورکلرنینگ آغیر ضرر کورگنلری، ایش سیزلیک و اوروشلرده تینچ اهالی اولیمی سانیگه آشگنی. ۲-طالبلر بیلن امیریکه ارا یره‌ش پروسه‌سی توخته‌لیش سببی. ۳-بوله‌جک سیلاوده افغانستان تورکلری‌نینگ جدی شکلده اشتراک ایتیب طبیعی حقلری بولگن آواز بیریش پروسه‌سیده حقیقی یشاوچی صفتی‌ده قتنه‌شیشلری توغریسی‌ده صحبت قیلیندی. اولتیریش ففتانینگ وقتینچه باشلیغی جناب رحیمی پیلوت رهبرلیگی‌ده باشله‌نیب، آجندا محتواسی‌گه کوره، بیرینچی و هر تمانلمه صحبت نوبتی ففتانینگ رهبرلیک اعضاسی حرمتلی پروفیسور توردیقل میمنگی جنابلریگه بیریلدی. میمنگی جنابلری یوقاریده ایتیب اوتیلگن آجندا اوستی‌ده جاری سیاسی و امنیتی وضعیت حقی‌ده تاریخی و ینگی بولیب اوتگن واقعه و حادثه‌لرگه اشاره قیلیب، ییغین اشتراکچیلریگه انیق بیلگی بیردی. میمنگی جنابلری تینچ‌لیک، سیلاو، اقتصاد و اجتماعی قیینچی‌لیکلرنینگ اچّیق قیره‌لریگه اشاره قیلیب، بو معمالرنینگ هر بیرینی ییچیلیشی‌ده ینه ملت‌نینگ قهرمانلرچه اویغاق و فعال بولیشلریده ایکنینی اشاره قیلیب، طالبلر بیلن تینچ‌لیک یریم قالیشی‌دن کیلیب چیقه‌دیگن نتیجه ایکی نرسه بولیشی ممکن ایکن‌لیگینی اورغوله‌دی. (یا طالبلر ۱۸ییلدن سونگ ینه بیر مرته اسلامی امارت قوره‌دی و یا اوروش دوام ایتیب سیلاو بولیب اوته‌دی.) جناب میمنگی‌گه کوره، سیلاو بشری بیر توپلم‌نینگ قراری نتیجه‌سیدن کیلیب چیقه‌دیگن سیاسی بیر یونه‌لیش دیر، اونده انسانلرنینگ فردی و جمعی شکلده تاثیراتلری بولیشی کورسه‌تیله‌دی. صحبت باشقه بیر بولیمی‌ده جناب میمنگی ملت‌نینگ محروم‌لیکلرگه قرشی اراده بیلن عمل قیلیشلری یخشی نتیجه بیریش باره‌سیده (صفاویلر دوره‌سیده تورکلر محروم قالگنی نتیجه‌سیده عثمانلی دوره‌سی باشله‌نیب، تاریخ آلتین یپراغلریده تورکلرنینگ منگو اثرلری قالگنی و شونگه اوخشش، داکتر نجیب دوریگه یکون نقطه‌سی جنرال دوستم باشده افغانستان تورکلری‌نینگ محروم‌لیکلرگه قرشی ایاققه تورگنلری نتیجه‌سی ایدی) دیگن افاده‌لر بیلن ملتیمیزگه ایسکی‌لردیک حماسه یره‌تیشدن قورقمسلرینی بیلدیردی. شونینگدیک ففتانینگ یاش اولوغلر بولیم باشلیغی جناب جنرال صاحب قیتمس هم افغانستان ایچکریسی‌ده اینیقسه تورک خلقی اورته‌سیده سیلاوگه اشتراک ایتمس‌لیک ذهنیتی بیریلیب باریلماقده‌لیگیدن تشویش بیلدیریب، ملی مسئله اوچون ملت‌نینگ حصه آلیشی اساسی طلب بولگنینی بیلدیردی. افغانستان تورکلری بو موضوع‌گه کیچیک توشینمسدن اززانچه فعال و جسورانه صحنه‌گه کیریشلرینی اورغوله‌دی جناب قیتمس. باشقه بیر تماندن ففتانینگ ایسکی باشلیغی حرمتلی دوکتور محمد عثمان بیلیم جنابلری سیلاوده نامزد بولگنلرنینگ اوتمیش و کیله‌جکلریگه قره‌ب، قیسی قتلم ملتیمیز اوچون کوپراق ایچ کویدیریب و کیله‌جکده سیاسی حق حقوقلریگه ایتیش اوچون وعده‌لریگه صادق قالیش قرارینی بیرگن تقدیرده سیلاوده ملتیمیز تمانیدن دستک بیریلیش مقصدی بیلن سیاسی پروسه ده بوتون کوچیمیزنی خرچ ایتیشیمیز تویله‌دی دیدی. عینی حالده، اوتمیشدن بولگن کم‌چیلیکلر کیله‌جکده بولمس‌لیک مقصدیده، انجنیر نجم‌الدین محمودی‌نینگ ایتیشیچه، “باشده جنرال دوستم، بوتون سیاستچیلریمیز نیچه ییللیک برنامه بیلن سیاست عرصه‌سیده فعال بولمه‌گن تقدیرده، ینه سیاست میدانی‌ده اویینلرنی یوتقوزگن تورک خلقی بوله‌دی. ففتا باشلیغی جناب رحیمی پیلوت‌نینگ تاکید قیلیب ایتیشیچه، سیلاو ملی پروسه‌سیده اوته اویغاق و اویغون بیر شکلده اشتراک ایتیب، خلقیمیزنینگ احتیاجلیکلرینی اوزیگه فرصت بیلگن فاشیستلرگه بوندن کوپراق شوم پلانلریگه یقین بولیش اجازه‌سینی بیرمه‌سینلر. جناب پیلوت بوتون سیاسی حزبلر و شخصیتلرگه سیلاو کمپاینی‌ده تیملر بیلن همکارلیک قیلیب تورگنلیکلری یانیده وحدت و ملی منفعتلرینی اساسی اورتم‌ده ملی بیر پلان و بیرلیکلرینی نظرده توتیب، ملتنی سیلاو پروسه‌لری اهمیتی و کیله‌جک سیاسی حیاتلرینی اولرگه آچیق و انیق کورسه‌تیشده منتظم پلان و دواملی پروگراملر آلیب باریشلرینی طلب قیلدی. شونینگدیک هاشم همدم طالبلر ینه اسلامی اماراتنی قورگن بیر تقدیرده، افغانستان تورکی خلقلری‌نینگ اجتماعی-سیاسی وضعیتلری بوندن هم یمان بولیشدن تشویش بیلدیریب، کیله‌جک سیلاو نتیجه‌سی آرقه‌سیدن باشقه قوملر مثالی، ملتیمیز اوچون تشقری و ایچکریده لابی‌گر بیر کولیکتیف بولیشی شرط و اینیقسه تحصیل کورگن یاشلریمیزنینگ ایش‌سیزلیک آفتیدن قوتقریب، اولرگه تویغو و تفکر تورتکیسی بوله‌دیگن جان‌کویر-غرض‌سیز ملی شخصیتلریمیز تشکیلاتی بولیشیگه تاکید قیلدی. ییغین کیچه اروپا وقتی بیلن ساعت ۹:۲۰ ده حرمتلی جنرال سراج‌الدین قیتمس اختتامیه‌سی بیلن یکون تاپدی.

پاسخ ترک

Please enter your comment!
Please enter your name here