سرپلده پارلمان انتخاباتی خاطره لریدن
ــــــــــــــــــــــــــــــــــــــــــــــــــــــــــــــــــــــ
یازووچی: اکادمیسین شرعی جوزجانی
سرپلده انتخابات 12نچی دوره سی قنداق بولیب اوتدی؟
پولیس بیلن یقه لشیب تیاقلنگنلردن: ملا عبدالخالق، قورغان تیپه لیک عبدالصمد، حاجی عبد الرزاق کینجه و باشقه لر. توغریده پولیس بیلن آدملرنینگ تارتیشووی کورینه دی.
1344 ییل سرپل حاکمی، ینگی صدر اعظم بولگن داکتر یوسف نینگ جینی احسان آتلیک بیر کیشی، خانلر بیلن کیلیشیب، اولرنینگ خدمتیده تورگن بولسه هم، سناتورلیک سیلاویده رحمتلی مولوی عبدالحکیم ولایت مقیاسیده کوپ رأی آلیب شبرغان ولایتی سناتوری صفتیده موفق بولگنلیگی، سرپللیکلرگه دل توققی بولیب، شورا انتخاباتیده هم موفق بولیشلریگه ایشانردیلر، نیگه که سرپللیکلر بیرلشیب انتخاباتنی یوتیشگه عزم قیلگن ایدیلر. خانلر 20 فیصد گه چه هم رای آلیشلری ممکن ایمس ایدی، سببی شو که اولرنینگ کتته کانی رئیس عبد الغفورخان سقاو اغتشاشیدن کیین ظاهرشاه تماندن چیکسیز صلاحیتلر بیلن سرپل حاکمی قیلیب تعیینلنگن ایدی. او برچه نینگ تقدیری بیلن اوینب، اهالی نینگ ییر و سوولرینی قلبکی قباله لر بیلن تارتیب آلیب، اولرگه بوی سونمگنلرنی صیاد خانی سلطان خاندیک قیلیب «گله گاو»گه هم باغلب اذیت و آزار بیرردیلر. بوغایی دهقانلرینی اولدیریب، نیمجان جسدلرینی الاوگه تشلب کویدیرگنلریدن هنوز کوپ مدت اوتمگن و سرپل اهالیسی بو فاجعه نی اونوتمگن ایدی.
انتخابات کومپاینی:
ـــــــــــــــــــــــــــــ
سرپل نینگ کوزگه کورینگن شخصیتلریدن بیری یقین دوست و مصلحتچیم رحمتلی عبد الستار گلشنی تشبثی بیلن عالملر، آق سقاللر و شهر متنفذلری اشتراکیده بیر ییغیلیش اوتکزیب، انتخابات اوچون کمپاین آلیب باریش و کیرکلی خراجاتلرنی تامینلش بوییچه چاره تدبیرلر کوریلدی. سرپل لیکلردن سرخک لیک رحمتلی ملا کریم، ملا عبدالخالق، سید محمد، عبدالصمد، مشهور صیادلیک عیار – تاغه مردان نینگ مریدلری بولگن فیض بخشی، اله – که و برچه خراباتیلر و بشقه کوپ روشنفکر ییگیتلربیزلربیلن همکارلیک قیلیب تورردی.
ایریم دوستلر بیلن شهر گذرلری، مسجدلر و قشلاقلرگه باریب اهالی بیلن ملاقات اوتکزه باشله دیک، شورانینگ اهمیتی و اونده مردم نینگ ایشانرلی نماینده سی بولیشی ضرورلیگی باره سیده صحبت قیلیب دولت نینگ فاشیستی ماهیتی و اونینگ تبعیض و ملی ستمگه اساسلنگن سیاستی اطرافیده گپیردیک و مهم مسُله لر بوییچه قوییده گیدیک توشونتیریشلرآلیب باردیک:
خانلر عایله سی دولت نینگ ایشانگن نوکرلری صفتیده ایشلب، اهالی نینگ سرنوشتی بیلن اوینیدی دیب ایضاحله دیک و بولرنینگ همه سینی کوپینچه آدملرنینگ اوزی کورگن مثاللر بیلن کورسه تیب بیردیک. مثلا اسحاقزی خانلری تمانیدن شهر و قشلاقلرده اهالی اوستیگه قیلینگن جبر و ستملر، ملک و جایلرینی تارتیب آلینیشی، بوغایی دهقانلری نینگ وحشیانه اولدیریلیب اوتگه تشله نیشی فاجعه سی، محمد گل مومند اوتکزگن عدالتسیزلیکلر، اوزبیکلردن قالگن علمی ادبی کتابلرنی کویدیریب نابود قیلیشی و مستحکم تاریخی قورغانلر جمله دن میمنه، شبرغان قورغانلری و سرپل نینگ کتته تاریخی بالاحصارینی خلق نینگ کوزی آلدیده بوزدیریب ییر بیله یکسان قیلگنی و شوکبیلر باره سیده توشونرلرلی صحبتلر قیلیندی.
مونداق ظلملر و حقسیزلیکلر نینگ آلدینی آلیش اوچون خلقیمیزنینگ بیرلشیب اتحاد و اتفاق بولیشی ضرورلیگی منطقی دلیللر بیلن اثباتلب بیریلدی و تاکیدلندی که حاضرچه بو یولگه اوتیش نینگ بیرینچی قدمی شوراگه اهالی نینگ اوزی آزادلیک بیلن انتخاب قیلگن وکیلینی یوباریشدر. شوراده بیر روشنفکر، صادق و مردم نینگ مشکلاتینی بیله دیگن وطنپرست وکیل باشقه وطن سیور وکیللر بیلن هم آواز بولیب، اولوس نینگ مشکلاتینی حل قلیش اوچون مبارزه قیلیشی کتته نتیجه لرگه آلیب باره دی. مثلا شورانینگ ییتتینچی دوره سی نینگ وطن سیوروکیللری بیرلشیب ملتگه کوپ خدمتلر قیلگن ایدیلر، جمله دن مملکتده جاری بولگن بیگار یعنی آدملرنی مجبوری شکلده پول بیرمسدن تیکین گه ایشله تیش قانونینی بیکار قیلگن ایدیلر. اولر جمله سیده سرپل نینگ فدایی وکیلی مرحوم محمد قاسم قاضی زاده هم بار ایدی.
اهالیگه توضیح بیریلدی که نیمه اوچون اوزبیکلر و تورکمنلر نینگ تیللریگه مطبوعات و رادیوده نشرات حقی بیریلمیدی و روشنفکرلری حکومت نینگ مهم اداره لریده قبول قیلینمیدی، نیمه اوچون اولادلریمیز آنه تیلیده مکتب اوقیشگه حقلی ایمسلر؟ صحبتلر جریانیده شونگه اوخشه گن کوپ سواللرگه جواب بیریلیب، موکللرنینگ قناعتی حاصل قیلینردی.
البته سرپل اهالیسی نینگ دقتینی تارتیب کیله دیگن بو کبی صحبتلر، خانلرگه هم، حکومت اداره لریگه هم یاقمس ایدی. اولر بیر قتار نوکرلری آرقه لی مین و صفداشلریمگه قرشی پرو پاگند نی یولگه تشلب، کابلدن کیلگن خانلرنینگ بیر اوگی اوغلی نینگ دوا فروشلیک دکانیده مینی مسموم قیلیش بوییچه هم کیلیشگن ایکنلر. بعضی بیر موضوعدن خبرتاپگن کیشیلر مینگه ینه شو دواخانه گه باریب بیران داری آلمنگ و ایشانمگن آدملر قولیدن بیران شربت و ایچیملیک ایشمنگ دیب، توصیه قیلردیلر.
عسکرلیک که جلب قیلیش پلانی:
ــــــــــــــــــــــــــــــــــــــــــــــــــــــــــ
انتخابات کمپاینی کون ساین اوز تاثیرینی کورسه تیب باریب، سرپللیکلرنی اتفاق و اتحادگه تشویق قیلگنی، خان و حکومت اربابلری نینگ جهلینی چیقردی. شو سببلی اولر بیر حیله اویلب تاپدیلر. اوشنده سرپل شبرغان ولایتی نینگ بیر ولسواللیگی ایدی. والی اورنیده مرستیال یعنی اونینگ اورینباسری وظیفه بجرردی. بیر کونی او مینی شبرغانگه تیله تیب، گویاکه خیرخواهلیک بیلن: شرعی جنابلری، اخلاقا سیزنی بیر گپدن خبر قیلیشنی ضرور دیب تاپدیم. انتخابات صندوقی قوییلگن کونی سیزنی عسکرلیککه جلب ایتیش اوچون کیلگن مکتوب اساسیده صندوقینگیزنی کوتریب، اوزیزنی خدمتگه یوبارماقچیلر، اگر امکانی بولسه چاره سینی کورینگ – دیدی.
1341 ییل شبرغان ولایتی مکلفیت مدیرلیگیدن آلینگن 46 نمره لی معافیت خطیم هم اونده مهر باسیلمگنی بهانه سی بیلن قبول قیلینمدی. بو خطنی مدافعه وزیرلیگیدن آلیشیم کیرک ایکن.
مرستیال نینگ آتی غوث الدین خان یا که غلام غوث ایدی. مین اونگه شرعیات فاکولته سی فارغ التحصیللری عالم جامع دینی صفتیده قانونگه موافق عسکرلیک خدمتیدن معاف قیلینگن دیسم هم، او مینگه قرب هر حالده بیر رسمی سند کیرک بوله دی دیب تاکیدله دی. مین مزار شریفده مولوی خسته نی آپپاق سقالی بیلن عسکرلیک که جلب قیگنلیکلرینی ایسلب، مسآله جدی ایکن لیگینی بیلیب آلدیم و اونگه رحمت دیب، سرپلگه قیتدیم و بو باره ده چاره کوریش مقصدیده یاش اولوغلرمصلحتی اساسیده کابلگه باردیم.
اوشنده حزب پرچه لنگن ایمس ایدی. بوباره ده ببرک کارمل مینگه یاردم بیردی. او مینی علومیلر عایله سیدن بولگن مدافعه وزیرلیگیده عمومی مکفیت مدیریگه معرفی قیلدی. تعجب شو که کمال الدین اسحاقزی اونیگ سینگلیسی بیلن اویله نییب، علومیلر نینگ یزنه سی بولگن ایکن. بو مینی تشویشگه سالردی. شونداق بولسه هم او مینگه حرمت کورسه تیب دیدی: کمال الدین مینینگ سینگلیمگه اویلنگن بولسه هم، مین اوندن نفرتلنه من. او جوده یمان آدم. خداسینی اونگه قرشی موفق قیلسین دیب ایریم سندلرنی آلیب کیلیشیم نی سوره دی. مین شرعیات فاکولته سیدن اوقیلگن شرعی علملر تصدیغینی آلیب کیلدیم. او قانونگه موافق مینگه رسماعسکرلیکدن معافیت خطی تیارلب مهر قیلیب بیردی.
هر حالده بیلگیلنگن کون ایرته لب سرپل بلدیه سی (شاروالیسی) محوطه سیده حاکم، قاضی، قومندان و بشقه حکومت مامورلری نظارتی آستیده بیشته کاندید اوچون مهر باسیلیب قفللنگن و کاندیدلرنینگ امضاسی بیلن تصدیقلنگن بیشته رای تشلش صندوقی بیراطاق ایچیده قوییلیب، سیلاو باشلندی. هر بیر صندوق یوزیگه کاندید نینگ عکسی و اوزی اوچون بیلگی لگن سمبولی قوییلگن ایدی. آدملر بیرین کیتین برماقلرینی بویب اوشه تامگه کیریب رای کارتینی صدوققه تشلب چیقردی.
مداخله و تقلب:
ـــــــــــــــــــــــــ
تقلب اولدن معلوم ایدی. آواز بیرووچیلر لیستلریده نمره قوییلمگن ایدی، نیچه کیشی آواز بیرگنینی بیلیب بولمسدی. قومندان بویروغیگه کوره پولیسلرمیدان اطرافیده توپلنگن اهالینی تیاقلربیلن اوریب ارقه گه سورگنده، ترتیبسیزلیک یوز بیرردی. همه اوشه تمانگه مصروف بولیب تورگنده، قاضی تیارلنگن جدول لرنی، رأی بیرگنلر لیستیگه قوشیب قویردی. آتلر یانیده نمره قوییلمگنی اوچون جدوللرنی اجره تیب بولمسدی.
میدان نینگ ایکی تمانیده تورگن آدملرگه بیریلگن اذیت و آزار، اولرنی پولیسلرگه قرشی تحریک قیلدی. پولیسلرو اولر آره سیده توقنشوولر بولیب، کوپ کیشیلر ضرب و شتم آستیگه قالدی. اصلی شبرغان ناقللریدن بولگن چماقدارلردن بیری امنیه کاتبی… پیوستون نینگ کرتیسی آرقه تماندن ایککی گه بولیب ایرتیلدی. اونی صورتگه توشیرگن ایدیم. مرحوم ملا عبدالخالق، قورغان تیپه لیک عبد الصمد، حاجی عبدالرزاق و بشقه کوپ کیشیلر ایاق آستی بولیب جبرکورگن ایدیلر. بو وحشیانه صحنه لردن کوپ عکسلر آلگن ایدیم. افسوس که هنوزگه چه تاپالگنیم یوق. اولردن ایکی ته بارینی قویدیم.
اذیت و آزار حددن اوتگندن کیین بیزاوچ کاندید – حاجی امان الله، حاجی قادر و مین، سرپل ولسوالی، قاضی سی و امنیه قومندانیگه قرشی توریب پروتست بیردیک، سیزلر قانوننی آیاق آستی قیلیب آچیقدن آچیق تقلب و خیانت قیله سیزلردیب قتتیق اعتراض بیلدیردیک و پارلمان انتخاباتیده قانوننی ایاغ آستی قیلیش ملت و وطنگه خیانت حسابلنه دی دیدیک. اولرنینگ اچچیغی کیلیب، بیزلر امنیتنی سقلشگه مجبورمیز دیب جواب قیترردی.
قانونده کاندیدلرانتخابات جریانینی یقیندن توریب نظارت قیلیشگه حقلی دیب یازیلگن بولسه هم، اولرعلنا قانونگه خلاف بیزلرنی سیلاو پروسیجریگه یقینلشگنی قویمسدی.
بو زوروانلیک نینگ اوچته سببی بارایدی:________________________
بیرینچیدن، ظاهرشاه دولتی انتخابات پروسه سیدن فایده لنیب اوزبیک و تورکمنلرنینگ بیلینی سیندیریش مقصدیده اولرگه اوز وکیللرینی آزادانه سیلش اوچون امکانیت بیرمی، ایشانچ و اعتماد بنفس لرینی نابود قیلماقچی ایدی،
ایکنچیدن، سرپل حاکمی احسان، تازه حکومت تیپه سیگه کوتریلگن داکتر یوسف صدر اعظم نینگ جینی ایدی، شو سببلی هیچکیمدن قورقمسدن ایستگن ایشینی قیلرد ی،
اوچنچیدن، کمال الدین اسحاقزی علومیلر عایله سی نینگ کویاوی و ظاهرشاه نینگ قیزی بلقیس و اونینگ ایری سردار ولی نینگ قاوورچاق نماینده سی صفتیده سرپلده ناقلین قبیله سی نماینده سی ایتیب تعیینلنگن ایدی.
شو سببدن انتخابات جریانی، قبیلوی تبعیض و ملی ستم نینگ علنی کورینیشی بولیب، قانون و انسانیتگه حرمت کوزگه تشلنمس ایدی.
حکومت نماینده لری اوزلری امنیتنی بوزیب، میدانده ترتیب اورنه تیش اوچون تارتیلگن ایپلرآرقه سیده هم آدملرنی تورگنی قویمسدی. اولرنینگ مقصدی رأی بیرگنی کیلگنلرنی قورقیتیب، صحنه دن قاچیریش ایدی. لیکن سرپللیکلر کمال جسارت بیلن اولرگه قرشی کوره شیب، تاغدیک میدانگه توردیلر و رأی بیریشگه دوام بیردیلر.
میرزا نعیم هیأت نینگ یانیده بیر گوشه گه اولتیریب، وضعیتنی تماشا قیلیب تورردی و نیمه یوز بیریشی بیلن علاقه سی یوق ایدی.
کمال الدین اسحاقزیدن اونینگ وکیلی حاجی خیر محمد خان نماینده لیک قیلیب آدملر اره سیده اختلاف تشلب یورردی. ییگیتلر اونی نیچه کیشیگه پول بیریب رأیینی ساتیب آلیش وقتیده توتیب آلدیلر، لیکن ولسوال بو شکایتنی ایشیتمدی.
سیلاونینگ ایکنچی کونی بیرینچی کوندن هم یمانراق بولدی. آدملرنی بهانه لر بیلن هر تمانگه سوریب، فضانی مختل قیلیب تورردیلر. رأی بیرووچیلر بیلن پولیس و حکومت نماینده لری اورته سیده قتتیق توقنشو و تصادم یوز بیریشی ممکن ایدی. بو وضعیتنی کوریب حاجی امان الله و حاجی قادر کاندیدلیکدن استعفا بیریشگه قرار قیلدیلر.
بلدیه سالونیده یاش اولوغلر ییغیلیشیده هزاره لر کاندیدی حاجی امان الله وضعیتگه اشاره قیلیب دیدی: عزیز برادرلر، احوالیمیزنی کوریب توریبسیزلر. حکومت نینگ همه سی رقیبلریمیز تمانیده، اولر بیزلرنی شکست بیرماقچی. اگر اتفاق بولمسک بای بیره میز. مین و حاجی قادر، شرعی صاحب اوچون کاندیدلیگیمیزدن اوته میز. بیزلرنینگ طرفدارلریمیز اوکیشیگه آواز بیره دی. لیکن بیر شرطیمیز بار و او شو که بیزلر قیلگن مصرفلریمیزنی بیرسنگلر.
همه بیر آواز بیلن اونینگ پیشنهادینی قبول قیلیب، مصرف لرینی تولیدیگن بولدیلر. بو مسولیتنی بایلر و دوکاندارلر اوز ذمه لریگه آلدیلر. مرحوم عبداالستار گلشنی پیشقدم ایدی. دعا و فاتحه دن کیین حاجی امان و حاجی قادر سالون نینگ تشقی صفه سیدن توریب سرپللیکلرگه خطاب قیلیب : عزیزبرادرلر، کوریب توریبسیزپراگنده لیک بیزلرگه شکست بیره دی. بیزلر همه میز بیر کاندیدگه آواز بیریشیمیز کیرک. مین و حاجی قادر سید عبدالحکیم شرعینی حمایه قیلیش اوچون کاندیدلیکدن استعفا بیره میز دیدی. حاجی قادر هم اونگه قوشیلیب اوز طرفدارلرینی شرعی صاحبگه رأی بیریلر دیب توصیه قیلدی.
اولرنینگ بو تصمیمی سرپللیکلرنی شور و هیجانگه سالدی، هر طرفدن تمجید و تحسین آوازی چیقیب، آدملر روحیه سینی کوتردی.
لیکن ولسوال و قاضی بو اعلانگه قرشی توریب، بیر آدمنی آتینی توتیب استعفا بیریش قانونگه خلاف بوله دی دیسه هم، حاجی امان سیز قانونیگیزنی خواهلگنیزدیک تطبیق قیله بیرینگ دیدی.
مین ولسوالگه قرشی توریب، قیسی یوز بیلن قانوندن گپیره سیز؟ اهالی نینگ توغریسیده بولیب تورگن بو وحشیانه حرکتلرقیسی قانونگه توغری کیله دی؟ حاکم جنابلری، سیز اساسی قانونده وعده بیریلگن دیموکراسینی – سوته کراسی – گه تبدیل قیلدینگیز کو؟ قیسی دموکراسیده انسانلرنی تیاق بیلن اورینگلر دیب ایتیلگن؟ بیز لر سیزنی قانون شکن لیک جرمی بیلن یوقاری ارگانلرگه چه تارته میز، دیدیم.
ولسوال مینی قماققه آلیشگه تهدید قیلدی. مین قولینگدن کیلگنینی دریغ قیلمه گین دیب جواب بیردیم. سرپللیکلر بیرلشیب میندن حمایه قیلیب تورردی. ولسوال مونی پیقب شستیدن توشتی. آره میزده کوپ مشاجره لردن کیین، سیلاو ایشی دوام ایتدی. آدملر روحیه سی کوتریلگن ایدی.
هر حالده بیرنچی انتخابات حوزه سی – سرپل شهریده بیشینچی کون شو وضعیت بیلن سیلاو توگه دی. صندوقلر آچیلگنده اسحاقزی نینگ صندوغی تقلب بیلن تولدیریلگنلیگی همه گه معلوم بولدی. مین ایککی مینگ و نیچه یوز رای آلگن ایدیم. اسحاقزی صندوغیگه ایکی مینگدن کوپ، میندن بیرمقدار کمراق رای سالینگن ایدی.
تصور قیلینگ، اگر تقلب و زوروانلیک بولمسه، قندی قیلیب اسحاقزیلر سرپل شهریدن 2000دن کوپراق رأی آلیشی ممکن ایدی؟ اینیقسه بیر ییل آلدین بوغایی دهقانلرینی اولدیریب کویدیرگنلریدن کیین؟
حکومت نماینده لری تقلب و دسیسه لربیلن انتخابات جریانینی مختل قیلیش لری نتیجه سیده تقریبا 3000 کیشی رای بیریشدن محروم بولدی.
انتخابات نینگ اساسی مقصدی اوزبیکلرگه مجال بیرمسلیک و اولرنینگ کاندیدیگه پارلمانگه باریش یولینی توسیش ایدی.
ایرته سی انتخاباتنی دوام بیریش اوچون ایکنچی حوزه یعنی سرپل نینگ کوهستانات علاقدارلیگیگه باریش کیرک ایدی. بو حوزه نینگ اینگ مهم یاش اولوغلری و اعتبارلی شخصیتلری بیلن کیلیشیلگن ایدیک. اولر اهالی نینگ هیچ بولمسه 80 فیصدی بیزلرگه آواز بیریشلرینی اطمینان بیرگن ایدیلر.
کیچقرون سرپل یاش اولوغلری ییغیلیشی بولدی. همه سیلاو جریانیده یوز بیرگن دسیسه لر و عملگه آشیریلگن تقلبلر اوچون عصبی لشیب، غضبلنگن ایدی. نیگه بیر عملی اقدام بیلن بو قانون شکنلیک آلدی آلینمگنی اوچون خفه و متأثر ایدیلر. مین اولرگه مسُله فقط سرپل معماسی ایمس، بلکه برچه شمال ولایتلریده اوزبیکلرگه قرشی شو کثیف سیاست عملگه آشیریلماقده دیب توضیح بیردیم و بو سیاست اینگ یوقاریدن سرچشمه آله دی. سیزلر فقط خانلرگه قرشی ایمس، بلکه دولت و سلطنت سیاستیگه قرشی کورشماقده سیزلر، چونکه کمال الدین اسحاقزی شاه نینگ عمک بچه سی و کویاوی سردار ولی نینگ قاوورچاغی بوله دی. شو نینگ اوچون اولرنینگ امری بیلن حکومت نینگ برچه نماینده لری اونینگ کیتیده تورگن دیب ایضاحله دیم.
ینگی صدر اعظم گه شکایت:
ـــــــــــــــــــــــــــــــــــــــــــــــــ
ییغیلیش اشتراکچیلری بو عدالتسیزلیککه قرشی کابلگه باریب ینگی کیلگن صدر اعظم گه دادخواهلیک عریضه سی بیلن شکایت قلیش کیرک دیب توختب آلدیلر. اولر حاجی عبد الستار بانک نی مینینگ نمایندم صفتیده کوهستان حوزه سیگه جونتماقچی بولدیلر. رحمتلی صیادلیک قاری عبدالله بو موضوعده کوپ اصرار قیلردی. مین و مرحوم گلشنی کابلگه باریش بیران نتیجه بیرمیدی دیب یاشی اولوغلرگه قناعت بیرالمدیک. مین مجبورا ایرته سی کابلگه قرب جونه دیم.
کابلده ینگی صدر اعظم داکتر یوسفنی کوریش آسان ایمسدی، دوستلر مصلحتی بیلن ایرته لب کارتۀ 4 ده اونینگ اویی آلدیده باریب چیقیشینی کوتیب توردیم. بیردن گاراج ایشیگی آچیلیب موتر سرعت بیلن چیقه دیگن حالتده اونینگ آلدیده توخته دیم. داکتر ماشین دروازه سینی آچیب نیمه ایشینگیز باردیب سوره دی. عریضه نی توتیب، مین سید عبدالحکیم شرعی جوزجانی سرپل کاندیدیمن و سرپل اهالیسی تمانیدن سیزدن عدالت سوره گنی کیلگنمن دیدیم. او بیردن قباغیی توشیریب، -( خبر دارم، این تو هستی که اوزبیک هارا تحریک میکنی؟) دیب سوره دی. جوابیگه دیدیم: (جناب صدر اعظم، اکثریت مردم سرپل اوزبیک استند و به من رأی میدهند. آیا میشود بدون تحریک و تشویق موکلین کمپاین انتخابات را انجام داد. من به نمایندگی اهالی سرپل آمده ام تا از شما دادخواهی کنم. ولسوال ، قوماندان شما یکجا با قاضی سرپل از کاندید رقیب من علنا پشتیبانی کرده احکام قانون انتخابات را کاملا زیرپا میکنند، موکلین مرا تحقیر، لت و کوب و اذیت میکنند. این چه نوع دموکراسی است. اگر شما به صفت صدر اعظم جدید شکایت مارا نشنوید، پس بگویید به کجا برویم؟ ) بیر آز قباغی آچیلیب (حالا بروید، بعدا می بینیم) دیدی و بشقه هیچکیمنی قبول قیلمی حرکت قیلدی.
ببرک کارمل و بشقه اورتاقلربیلن مصلحتلشدیم، اولر باش وزیرنی تیزلیکده قیته کوریش ممکن ایمس دیدیلر. شکایتنی ایشیته دیگن بشقه بیران صلاحیتلی مرجع بولمگنی اوچون سرپلگه قیتیب کیلیب، بولیب اوتگن واقعه نی یاش اولوغلرگه ایتیب بیردیم.
کوهستاندن قیتیب کیلگن بیزنینگ وکیلیمیز ایتیشیچه انتخابات هیُتی کوهستانده هم رأی بیرگنی کیلگن اهالیگه سرپلگه قیلگنلریدیک تهدید، اذیت و آزار کورسه تیب، بشقه بیر حیله نی هم اویلب تاپگن ایکنلر، یعنی ایرته لب حاکم، قاضی و قومندان بیلن آوگه (شکارگه) چیقیب تاغ اوستیده بند قالگنلیکلری بهانه سی بیلن بیر کون انتخاباتنی کویدیرگن ایکنلر. مینینگ وکیلیم هیچ قنداق اعتراض قیلیشگه قادر ایمس ایکن.
خلاصه شو که هیُت اعضالری کمال الدین اسحاقزی صندوغیگه کوپراق کارت تشلب، گویا که او میندن کوره کوپراق رأی آلگن دیب اعلان قیلگندن کیین شهرگه قیته دیلر.
یاش اولوغلر موندن قتتیق مأیوس و متأثر ایدیلر. اولر بو حکومت نینگ همه سی بیر گور، صدر اعظمی سردار داوود بوله دیمی یا که داکتر یوسف، ایتگنلریدیک سگ زرد برادر شغال دیب ناراضیلیک بیلدیرردیلر.
مین، ستار جان و قاری عبدالله اولرگه روحیه بیریب، کوره سیلر آخری موفقیت بیزنیکی بوله دی. هیچ بیر کیشی یا که بیر قومگه حق اوزیدن اوزی بیریلمیدی، هرکیم اوز حقینی مبارزه بیلن آله دی. اگر بیزلر اتحاد و اتفاقنی سقله سک، کیینگی انتخاباتلرده البته موفق بوله میز دیب روحیه بیرردیک.
بو سیاست فقط سرپلده ایمس، بلکه بشقه ولایتلر مخصوصا میمنه ولایتیده یمانراق شکلی بیلن تطبیق ایتیلیب، ولسی جرگه گه، قیصار، دولت آباد و میمنه پشتونکوتیدن، شونیگدیک شمال ولایتلریده اوزبیکلر یشیدیگن کوپ جایلریدن فقط اوغانلر وکیل قیلیب تعیینلنگن ایدی.
ایسینگیزده بولسه سکزنچی دوره انتخاباتیده ولسی جرگه کاندیدی مرحوم نظر محمد نوا، اونینگ صفداشلری مولوی علاوالدین و…..کبی عالم ومتنفذ شخصیتلر میمنه دن کابلگه سورگون قیلینگن ایدی.
بو سیاستدن دولت نینگ اساسی مقصدی اوزبیکلرصفینی سیندیریب، اولرنینگ روشنفکر و بیلیمدان نماینده لرینی پارلمانگه یول بیرمسدن، روحیه لرینی ضعیفلشتیریشدن بشقه نرسه ایمس. نیگه که اگر اوزبیک و تورکمنلر اوز حقیقی وکیللرینی شوراگه یوبارسه لر، اولر پارلمان تریبونیدن توختب اوز حقوقلرینی طلب قیلیش یولیده دولتگه قرشی جدی مبارزه آلیب باریشلری ممکن.
ییغیلیشگه کیلگنلر بیزلرنینگ سوزلریمیزنی تصدیقلب مبارزه نی توختتمیمیز دیب وعده بیردیلر. مین صحبتیمنی قوییده گیدیک ختم قیلدیم: عزیز وطنداشلر، شونی بیلیب قویینگ اگر دولت سیاستیگه تسلیم بولیب، اونینگ ضدیگه کورش آلیب بارمه سک، عاقبتیمیز یمان بوله دی، جیم اولتیریب برچه ییر و سوویمیزدن ایریلیشیمیزتورگن گپ. اوشنده احوالیمیزبیش بتر بولیب، هویتیمیزوملی افتخارلریمیزدن ایریلیشیمیزهم ممکن.
ییغیلیش اشتراکچیلری بو اچچیق حقیقتنی تن آلیب، بو کبی بیداد گه قرشی کورش آلیب باره میز دیب تأکیدله دیلر. اولر بیلن خیرلشیب ایرته سی کابلگه قیتدیم.
عقرب اوچنچی کونی:
ـــــــــــــــــــــــــــــــــــــ
کابلده عقرب آیی نینگ اوچنچی کونی پارلمان نینگ 12 دوره سی آچیلیشی کیرک ایدی. اونده ینگی تعیینلنگن صدر اعظم دکتر یوسف گه رأی اعتماد بیریش مراسمی بولیب اوتیشی ضرور ایدی. بو تاریخی کون بیرمثلی کم بولگن حادثه نینگ گواهی بولدی. پوهنتوندن کیلگن یوزلب محصل پارلمان بناسی آلدیده ییغیلیشیب رأی اعتماد علنی بولیب، محصللر و سیاسی جریانلرگه شورا سالونیگه کیریش اوچون رخصت بیریلسین دیب طلب قیلدیلر. لیکن دولت مونگه رخصت بیرمگنی اوچون میتینگ دولتگه قرشی بیرکتته مظاهره نینگ شکلینی آلدی و مظاهره چیلر دولتگه قرشی شعارلربیلن حرکت قیلدیلر. وضعیت جدی توس آلیب پارلمان آچیلیشی توخته تیلدی.
بو حادثه نی کوتمگن مستبد دولت اضطرابگه توشیب، نیمه قیلرینی بیلمی قالدی. شاه نینگ کویاوی قوای مرکز قومندانی شخصا میدانگه کیلیب قطعه ضربتینی تیله تیب مظاهره چیلرنی یولینی توسیب، پراگنده بولیشلرینی طلب قیلدی. لیکن مظاهره اشتراکچیلری بو حربی دستورگه قولاق سالمی دموکراسی اوچون و استبدادگه قرشی شعارلربیلن ایلگری یوریشنی باشله دی. حربی قومندانلر تماندن بیریلگن اخطارلرگه قره می اوز یولیگه دوام بیردی.
انسانلرنینگ بو جسارتی سردار ولی نینگ غضبینی قوزغب ، قورالسیز محصللرگه قرشی اوق اوزیش امرینی بیردی. نتیجه ده بیرینچی صفده تورگن اوچ کیشی اولردن بیری مینینگ دوستیم و یقین اورتاغیم آقا سید نسیان نینگ دوستی محمد حسن خیاط و بیر محصل اوز قانیگه بویه لیب شهید بولدیلر ونیچه کیشی یره لندی. بو مسالت آمیز جریاننی ا خ د ح نینگ مرکزی کمیته سی اعضاسی مرحوم محمد طاهر بدخشی رهبرلیک قیلردی. بدخشی قماققه آلینیب انچه مدتدن کیین محاکمه گه تارتیلدی، لیکن اونگه قرشی ییترلی دلیل موجود بولمگنی اوچون برائت آلدی.
شو یوسینده افغانستانده 12 دوره پارلمان انتخاباتی دولت نینگ توغریدن توغری مداخله سی نتیجه سیده سرپل لیکلراوچون سلبی نتیجه آلیب کیلگن بولسه هم، دولت نینگ استبدادی ماهیتینی یخشیراق آچیب بیردی وینه بیر بارخانلر اونینگ اویینچاقلری ایکنلیگینی اثباتله دی و اهالینی اوز حقوقی اوچون کوره شیشگه شیلنتیردی.
سرپللیکلرنینگ پولیسلر بیلن توقنه شوویدن بیر صحنه
