****
افغانستان دولتی تمانیدن باسیلیب چیقگن تورکی کتابلریمیز اسف بیلن که اونلرچه ییلدن بری وزارت و ریاست قماخانه‌لریده اسارت آستیده‌دیر. اوزبیکچه و تورکمنچه کتابلریمیز باسیلیب چیقیگنیدن بری بیر تورلی اوقووچیلرگه تاپشیریلمدی. تاپشیریلمایشیگه، گاه وزارت باشیگه کیلگن متعصب وزیرلر سبب بولگن گاه هم متعصب معارف ریسلری و والی صاحبلر. اوشبو توغریده‌گی تینیمسیز هیقیریشلریمیزگه کیم زمان وزیرصاحبلر، والی صاحبلر و وکیل صاحبلر خام وعده‌لر بیرگن بولسه هم وفا قیلمدیلر. فقط سونگ پیتلرده معارف وزیری تمانیدن رسمی مکتوب آرقلی اوزبیکچه و تورکمنچه کتابلرنینگ توزیعسیگه تاکید بولگن ایدی. بو معتبر بویروق، هلیگچه هم بیر تورلی عملگه آشمدی ویاهوت آشیریلمای تورگن.
بلخ ولایتینینگ نهرشاهی ولسواللیگیده بیر اورته(متوسط ) مکتبنینگ کورشچن بیر اوقوتووچیسی بولگن حرمتلی استاد کفایت الله خان«کفایت» نینگ تیلسیورلیک عشقی و جسور اقدامیگه، افغانستان تورکلری تیل تاریخ وتوره(تیتاتو) تحقیقات مرکزی، مزارشریف افغانستان جنبش یاشلری و مزارشریف خاتین قیزلر ریاستی باشده بولیب، محله‌نینگ اولوغلری و یشاوچیلری برچه‌سی بیرلیکده ایگه چیقیب اوشبو آرمان اوچون قولقولگه بیردیلر. چتین کورشلر نتیجه‌سیده اوزبیکچه و تورکمنچه بلخ ولایتینینگ معارف تعلیمی نصابیگه کیریتیلدی. اینقسه بلخ معارف ریاستی‌نینگ قماقخانه‌سیدن بیرینچی صنفدن آلتینچی صنفگچه ۳۰۰۰(اوچ‌مینگ) جلدگه یقین اوزبیکچه مکتب کتابی چیقاریلیب، ایلتیب اوقووچولرگه تاپشیریلدی!
مزارشریف مرکزیدکی و ولسواللیکلریدگی بشقه جانکویر و تیلسیور استادلریمیزدن ایسته‌گیمیز شول کیم، استاد کفایت‌الله خان «کفایت»کبی اوز محله‌لریدگی مکتبلرده آنه تیلیده اوقیش حقی توغریسیده بیل باغلب چیقسین. بیز کبی ملتیمیزنینگ معتبر خادم قوریملری و نهادلری سونگ دقیقه‌گچه یانباشلریده توریب، قوللب و قوت‌لب یوتوق اوچون بیرلیکده کوره‌شیشگه تیارمیز!
«تیتاتو تحقیقات مرکزی»
