دوکتور محمد عثمان بیلیم نی اوزبیکستان قونسول لیگ تمانیدن مونشن شهریده تیکلنگن ینگی ئیل بیرامیده سوزچیقیشی نینگ متنی
حرمتلي تيلداشلر و تورك كوكنيدن كوكر گن ارقداشلر، بيرينچي دن مينگلرچه مرحبا لر حضور لرينگيز گه هديه ايلب ، نوروز و قوياش تقويميگه باغليغ ١٣٩٨ لمچي هجري ئيل ني كيليشي ني قوتلوغ بولسون ايتيب ، تينگري تعالي دن برچه لرينگيز گه ساغليگ، خوشبختليگ، تينجليگ، كامياب ليگ لر آرزو قيلمن!
بو كون مينينگ حياتيم ده بير قوانجليگ وانوتيغ سيز بير كون دير ، كي نوروز بيرمي نينگ طفيليدن سيز الوغوار شخصيت لر بيلن چي، بيوگ وعظمتليگ تورك اغاچي نينگ كوكنيدن باش چيقرگن؛ اوزبيك؛ توركمن؛ قرغيز؛ قزاق، تاتار، آذري، تورك وكوپلر بشقه اسم لر گه مسما دور، بير ليك وبرابرليكده ،بابالريميزدن قالگن نوروز بيراميني قوتلايميز .
كته رحمت اوزبيكستان ايلچي خانه و قونسول گرليگي دن ، مونشن شهريده كي بو كونكي نوروز بيرم توپلمي ني بجريش يوللريني تيگيسلب، تورك كوكنيدن باش كوتر گن ايري خلقلر ني نماينده لريني ايري مملكتلر دن بير ايرگه ايغيلماغ إمكاناتي ني يرتيبدي.
مين بير اوغانستانليگ اوزبيك تورك فرزندي من، كي يمان حادثه لر نتيجه سيده آته يورت وآنه ملكتيمدن اجرشيب، جبر اساسيده كيتر يوليم دن ادشيب ، كوپ ئيللر دن بو يانده عايلم بيله آلمانيه ده مقيم بوليب تورگن من!
اوغانستان مملكتيده مينگلر ئيل دن بو تمان تورك كوكنيدن باش كوتر گن اوزبيك ،توركمن، قرغيز، قزاق، بيات، ايماق، تاتار، هزاره، قزلباش، واخي وبشقه خلقلر حيات سوروب، بيوگ تخاري، كوشاني، يفتلي، تگين شاهي لر ، غزنوي، سلجوقي، خوارزمشاهي، غوري، تيموري، بابري، شيباني ، افشاري دولت وتمدن لر ني يره تيشي إسلام كيليشي دن آلدين وإسلام كيريشي دن سونره ،حصه قوشيب وافتخارات يرتگنلر!
شوبوكون اوغانستان اسميگه مسمي بوليب تورگن مملكت گه ، توقوز ميليون دن آشه راغ تورك خلقلري كي، تاريخ گه بولگن جفالر گه قره مسدن ، هنوز هم آنه تيللريگه قونوشوب وتوركليگ افتخار لريني أسره ب كيلگن لر ، واون ميليون گه يقين تورك تبار لري بار كي ، آنه تيللريني انوتيب ، پارسي ويا پشتو تيللرگه صحبت قيليب وليكن اوز لري ني تورك كوكنيگه باغليغ كوره ديلر، حيات سور ماغ حالت دور لر!
اوروپا ده هم، اوغانستان ليگ توركلر مدني فدراسيون نينگ تخميني إحصائيه سي نينگ اساسيده اوچ مينگ وبيش يوز دن آشه راغ اوغانستانليگ اوزبيك، توركمن، قزاق، قرغيز عائله لر واون بيش مينگ دن كوپراغ هزاره توركلري كه پارسچه گه تكلم ايتديلر، ايري ايري اوروپا يي اولكه لرني وطنداشليگي گه ايگه چيقيب ، حيات اوتكر مال حالتي گه دور لر! كي مين اوغانستانليگ توركلر مدني فدراسيوني نينگ باشقراوچي شوراسي نينگ بيرعضو صفتي ده ، سيز لرني خذمتلرينگيز گه عرض ايته من!
كي سيز لرني هرتمانليگ مادي ومعنوي حمايت وياردملرينگيزگه احتياجي ميز بار!
نوروز بيرمي ني كي بشريت تاريخي ده بير طبيعت بيرام صفتيده، كي قيش ني بوتيشي وبهار كيليشي بيلن تجليل بوله ايكن ، تاريخ گواه ليگي ده بيرينچي مرتبه بو كونكي شكلي ده ، بير سلجوقي تورك امپراطور ملكشاه سلجوقي اسميگه، ينگي اسلامي هجري شمسي تقويمي نينگ أساس قائيشي بيلن ايجاد قيليب وتاريخ گه اهدأ قيلگن، كي عجم نوروز بيرامي عنوانيده بو كون بير خيل مملكت لر گه منجمله اوزبيكستان، تاجيكستان،افغانستان، آذر بايجان، ايران، توركيه، پاكستان، هندوستان و بيرخيل بشقه اولكه لر گه تجليل بولدي!
مين چين يوركدن آرزو قيلمن كي جهان توركلري ، عالم ارا بيرليك وبرابر ليك بيلن ايسكي فرهنگ وايسكي تيل شريك ليگ، قان شريكليگ وتاريخ شريكليگ لر بنا لري ده، بوايگيرمه بير لمچي عصر ده بيربير لري ني دوستليگ و حرمت بنا سيده قبول ايلب، بوكونكي مستقل بارليگلريني ، اوتگن عظمتليك توركلر تاريخيگه پيوند اوريب، شو خيل فرهنگي مناسبت لر دن فايده لنيب، اوزارالري گه بير ليك بناسيني بنياد قايسه لر!
اينه بير مرتبه نوروز بيرمي ني قوتلوغ بولسون ايتيب ، كيله جك ئيل دواميده بر چه تورك خلق ارا بيرليك واتفاق ، اولكه لر گه تينجليگ، عايله لر گه ساغليگ و سيز لرگه ساغلم و سعادتليگ حيات آرزو قيلمن.
توجه لرينگيز دن كته رحمت
معمارليگ علوم دوكتوري واوغانستان ليگ توركلر مدني فدراسيوني نينگ رهبرليگ شورا رئيسي ني اورون بأسري محمد عثما
