سرپل «بوغایی»سیده شهید بولگن دهقانلراوچون یازیلگن ایکی شعر:

سرپل «بوغایی»سیده شهید بولگن دهقانلراوچون یازیلگن ایکی شعر:
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

بیرینچی شعر (خلق دردی) 1965 میلادی، 1343هجری ییل، 22 د لو آیی، جمعه کونی، سرپل شهری نینگ بوغاوی “بوغا یی” قشلاغیده، اوز ایکین زارلری اوستیده، ناقلین خانلری ـ اسحاقزیلر تامانیدن وحشیلرچه آتیلگندن کیین، تیریکله یین کتته النگه ده کویدیریب اولدیریلگن آلتی ته دهقان فاجعه سی مناسبتی بیلن یازیلگن ایدی. تأسف بیلن ایتیش کیره ک که شعرنینگ یازیلیشی و فاجعه نینگ تاریخی، “یورک سرلری” شعرلریم توپلمیده نا توغری شکلده 1954 میلادی و 1332 هجری ییل دیب نشر ایتیلگن.

ایریم عایله لری و صورتلری عنوانده بیریلگن مرحوم شهید لر قوییده گیلردن عبارت ایدی:

1- مرحوم محمد قل، 2- مرحوم ملاشریف، 3- مرحوم احمد، 4- مرحوم یادگار، 5- مرحوم غلام قادر، 6- مرحوم عبدالواحد.

بولردن تشقری توققیز دهقان قتتیق یره لنگن ایدی.

حاضر اوشبو الملی فاجعه دن 54 ییل اوته دی. بیز اونی تورکستان خلقلری حیاتیده یوز بیرگن سانسیز قیغولی فاجعه لردن اینگ دهشتلی لریدن بیری صفتیده همیشه حرمتلی وطنداشلریمیزگه ایسله تیب توریش کیرک دیب اویلیمز. مرحوم شهید لرواولرنینگ ایریم عایله لری صورتلری، اوشه زمانده محترم ژورنالیست غلام نبی خاطرنینگ شخصی جریده سی “پیام امروز” نینگ 1344 ییل 21 حمل سانیده نشر بولگن ایدی. البته فاجعه بوییچه معلومات و شهیدلرنینگ صورتلرینی دوستیم غلام نبی خاطرگه مین تییارلب بیریب، اولرنینگ عایله لری بیلن اوچره شتیرگن ایدیم.

شونینگدیک مرحوم دوستیمیز محمد امین اوچقون هم اوشبو دهشتلی فاجعه مناسبتی بیلن «سرپلده آتش» عنوانی بیلن بیر غمنامه یازگن ایدی. هر ایککی شعرنی هم حرمتلی وطنداشلرگه تقدیم ایته من.

خلق دردی

ییغله سم ایککی کۉزیمدن آقیزیب مین یاشلر
سوو بۉلیب آققه¬ی چیدالمسدن بو تاغ و تاشلر.

بیر من اېرمسمن کۉنگول بیرگن سینگه ای سیوگلیم
جان و دلدن عاشقینگ دورلر قریلر، یاشلر.

تنگری اولدین بیلردی عشق اېلین اۉلدورگوسین
شو سببدن بیردی او سینگه قیلیچدېک قاشلر.

سۉیله گیل سیومه¬ی بۉلرمو سین کبی طنازنی
کیم اۉتر بۉلسنگ اېگیلگه¬ی یۉللرینگده باشلر.

اې گۉز¬ل هجرینگ چیکردیم لیک نیلای عاقبت
آلدی میندن خلق دردی طاقت و برداشلر.

قانگه تۉلدی کۉنگلیم اېل نینگ آغیر احوالین کۉریب
چونکه تقدیری بیلن اۉینر نیچه اوباشلر.

تا “بوغایی” اوستیده یاغدی مصیبت یاغمیری
ظلم اۉتی بیرلن توتشتی “سرپل” و “لولاش”لر

غفلت اویقوسیدن اویغانینگ وطنداشلر کیلینگ
قۉیدیلر مقصد ساری آلغه قدم یۉلداشلر

کیم اېدیک تاریخده بیر کون، نه بۉلدیک عاقبت
اې ستم آستیده قالگن بینوا قرداشلر

تیکله¬گین قدینگنی، سیندیر عیش و عشرت کاسه سین
اۉزگه لر ایلگی نینگ آستیده قالر عیاشلر

الپ سن، اېسکی جهان تاریخیده سین ارسلان
همتینگ گه عالم اهلی کۉب دېگن شاباشلر

علمینگ اۉتیدین بیر اوچقون “کۉرگانی جدولی”
“آقسرای” و “تاج محل” فضلینگ اوچون پاداشلر

تیکله دی شرق اویغانیش دورین “نوایی” همتی
بو یوتوقلرنی چیزیب قالدیردیلر نقاشلر

حکمتینگ انواریدن “فارابی” دور یارقین مثال
بیردی عالمغه تفکر مطعمیدن آشلر

اې اولوغ خلقیم، اولوسیم، اې اېلیم، اې ملتیم
بیرلشیب تشلنگ¬ قدم، اې کیکسه لر، اې یاشلر!
ـــــــــــــــــــــــــــــــــــــ
شرعی جوزجانی

ــــــــــــــــــــــــــــــــــــــــــــ
سرپلده آتش

سرپل ده طغیـان سرپل ده آتش،
کیم کویدیریلـدی(سکیزته دهقان)،
بیر نیچه قانخور انسان سرکش،
ایلگیده بولـــدی بـو ظـلم و طغیان.

ناگه قوتیرگن قانخور «سپَی لر»
نان ییب همیشه دهقان قولـیدن،
اوشبو سپیلرـ «اسحق زی» لر،
اسمین توتیشگه عارایتکه ی انسان.

بیرمینگ و اوچ یوز قرق اوچ ییلینده،
سرپل ده بـولــدی اوشـبو جنـایت،
افغانســتان نینگ خـلقـین تیلــیـنده،
نفرتلــــه قالگی بو قــانلی داستان

اوشــبو جنایت تاریخ ده قــالـگـی،
انسان ایشینی تــاریـخ اونـوتمـس
تورکستان اهلی بیرکون اوچ آلگی،
کیـــلگای محقَّق بیر ینگــی دوران.

افغـانســتان نینگ دولـت بنــــاسی،
فاشیست بیر قوم بیرله قـوریلـــگن،
ظــلم و سـتم نینگ بـو دوراساسی،
کــیم خـلق لرنی قیلگان پریشان.

هوشیار اولینگلرای اولکه داشـلر،
فـرصتنی قؤلدن بیرماک خطا دور،
برلشسین ایندی همـتلی یاشـــــلر،
قیلسون اولوس نینگ دردیگه درمان.

ایسکی بنـــالر آخــر بـوزولـــگی،
جبرزمان نینگ دوربــویله حکمی،
خوشبخت توپلام بیشک توزولگی،
حققه یتوشکــای هر تورلیک انسان.
ــــــــــــــــــــــــــــــــــــ
محمد امین اوچقون
قندوز، نوایی وات