عزیز وحرمتلی اوقووچیلروتیلداشلر!
موندن تقریبا 10 ییل آلدین اولکه میز تورکلری نینگ بیر قتار ملت سیور رسالتلی فرزندلری تشبثی بیلن افغانستان تورکلری مدنی فدراسیونی بیرینچی قورولتایی هالند مملکتی تیلبورخ شهریده یولگه قوییلیب، کینگ کولملی تارتیشوولر و مناظره لردن سونگ قورولتایگه قتنشگن 150 کیشی نینگ کوپچیلیگی آوازی بیلن بو ینگی انجمن «ففتا» دیب اتلیشی تصدیقلندی.
ایریم اشتراکچیلر «تورک» سوزینی انجمن آتیگه قوشیش گه قرشی توریب، بو سوز بیزلرنی بشقه ملیتلردن اوزاقلشتیره دی دیگن فکرنی اورته گه تشلگن حالده، اونینگ آتینی توبدن اوزگرتیریش اوچون آیاق تیرب تورگن ایدیلر. لیکن محافظه کارلیکدن کیلیب چیقه دیگن بو فکرگه کوپچیلیک قطعیت بیلن قرشی توریب، تورک سوزی برچه تورکی خلقلرنینگ مشترک هویتینی افاده لش بیلن بیرگه اولرنی بیرلشتیریش جاذبه سیگه هم ایگه بولگنلیگی اوچون ففتا یعنی «افغنانستان تورکلری مدنی فدراسیونی» نینگ نامینی دور طلبی و اولکه نینگ عینی و ذهنی شرایطیگه ماس دیب اکثریت بیلن تنله دی و شو یوسینده افغانستان تاریخیده بیرینچی مرته ففتا – تورکلر مدنی فدراسینی توغیلیب ، عصرلردن بیری مسلط بولیب کیله یاتگن جیم- جیتلیک (سکوت) طلسمینی خلق ارا مقیاسده سیندیردی، شورویلر تماندن تحقیقلنیب یوقاتیشگه حکم ایتیلگن و افغانستان دولتی تمانیدن اونی تاریخ صحیفه سیدن اوچیریب تشلش سیاستی یولگه قوییلگن «تورک»سوزی تیکلندی و وطنداشلر دقت و اعتبارینی اوزیگه تارته باشله دی.
بیر ییلدن کیین دنمارک کوپنهاگن شهریده بولیب اوتگن جرگه ده ففتانینگ برنامه سی و اساسنامه سی بیر آواز بیلن تصدیقلنیب، اوز مرامی وتشکیلاتی معیارلریگه ایگه بولدی و ریجستر بولگندن کیین اوز نشریات اورگانی«ففتا» ویب سایتنی آچیش بیلن اولکه تورکلرینی اوز تاریخی مدنیت ومعنویتلرینی تیکلش بیلن اوزلیکلرینی انگلب آلیب، وطن و جهان تاریخیده یوکسک اورین توتگنلیکلرینی کوریشگه چقیردی.
ففتا سایتی، فدراسیون نینگ ملی- معنوی وسیاسی غایه لرینی ترقتیب، اوقوچیلرنینگ سیاسی آنگی ومعنوی سویه سینی آشیریش یولیده دقتگه لایق فعالیت آلیب باردی. مخصوصا افغانستان و ایسکی خراسان نی گویا که اوز آته- آنه لریدن میراث قیلیب الگندیک، شخصی ملک حسابلب، اوزگه ملیتلرگه هیچ قنداق حقوق قایل بولمیدیگن اولکه شووینیستلری و تارفکر ناسیونالیست-آریائیچیلری(آریا پرستلری) نینگ ایچی کاواک ادعالریگه قرشی توریب، اولرنینگ باطل و اساسسیز ایکن لیگینی اثباتلش یولیده تأثیرچن کورش آلیب باردی.
ففتا مالموده 2014بولیب اوتگن ایکنچی قورولتایگه چه ایچکی انحرافلرو تشقی تفتینلرگه قرشی قطعیت بیلن کوره شیب کیلدی و اوتگن تجربه لردن فایده لنیش نتیجه سیده فردی (بیرکیشیلیک) رهبرلیکدن وازکیچیب، جمعی و کینگاش اساسیده باشقریش سیستیمینی قبول قیلدی، اساسنامه وبرنامه اولرده کیریتیلگن تعدیللر بیلن بالاتفاق تصدیقلنگندن کیین، سوغاریلگن تیمیردیک، ایکنچی قورولتایدن موفقیت بیلن چیقیب اوچنچی تکاملی باسقیچ تمانگه یول آلدی.
تناوب یعنی نوبت بیلن ایشلش رهبرلیک اصولی ایجابی نتیجه بیردی. اونگه کوره باشقروو هیئتی اعضالریدن هرکیم بیرییل ریاست وظیفه سینی اوز ذمه سیگه آلیب ایشلیدی و ییل توگه گندن کیین بو وظیفه نی ایکینچی عضوگه تاپشیره دی.
10 ییل جریانیده ففتا افغانستان و چیت مملکتلرده قنات یایدی، اونینگ نماینده لری تورلی منطقوی و خلق ارا کنفرانسلرگه اشتراک ایتدی، تشکیلی جهتدن کوچیدی، اعضاو علاقمندلری نینگ سانی آشیب باردی. 2018 ییل 25 دیسامبر کونی فدراسیون اساس سالینیشیدن اون ییلگه یقین مدت اوتدی. اون ییل، چیکسیز زمان اولچاوی بیلن قیاسلگنده نهایت آز کورینسه هم، واقعلیک معیارلری بیلن اولچه گنده، قیسقه لیگی گه قره مسدن تینیمسیز فعالیتلرـــ اینتیلیشلر و ایزلنیشلر و اولرنینگ ثمره سی بولمیش یوتوقلرگه بای وکوپ ییللرگه تینگ کیله دیگن مدت حسابلنه دی. شوتاریخی کونده بلژیک و اروپا اتفاقی باش کینتی بولمیش بروکسل شهریده، تورکیه و اروپا مملکتلری (آلمان، سویدن، دنمارک، ناروی، هالیند، تورکیه و اتریش)دن کیلگن 50 که یقین ففتانینگ سیلنگن نماینده لری اشتراکیده بولیب اوتگن افغانستان تورکلری مدنی فدراسیونی اوچینچی قورولتایی، ففتا حیاتیده بوریلیش نقطه سی و اونینگ اوچنچی تکاملی باسقیچگه کوتریشی حسابلنه دی. ففتانینگ اساسچیلریدن تنیقلی عالم پروفیسور دوکتور عنایت الله شهرانی امریکادن، بابر انجمنی، آیدن مالمو انجمنی سویدن دن، ظهیرالدین محمد بابرانجمنی جوزجان ولایتیدن و باشقه 40 دن آشیق مدنی تشکیلات وانجمنلر، علمی و ادبی شخصیتلر تبریک سوزلرینی یوللب، ففتانینگ خط حرکت و خدمتلرینی تاکیدلگن حالده اونگه یوتوق و موفقیتلرتیله گن ایدیلر.
کنفرانس جریانیده افغانستان ملی اسلامی جنبشی اساسچیسی، افغانستان جمهوریتی بیرینچی معاونی ستر جنرال عبدالرشید دوستم ففتانینگ اوچنچی قورولتاییگه آنلاین اشتراک ایتیب، اوشبو مناسبت بیلن ففتانی قوتله دی و افغانستان تورکلرینی بیرلشتیریش و اولرنینگ مدنی حقوقیدن حمایه قیلیش ساحه سیده آلیب بارگن کینگ قمراولی فعالیتلرینی ایجابی بهالب، اونگه بو یولده کتته یوتوقلر تیله دی. شونینگدیک او افغانستانده بولیب اوته دیگن اچینرلی وضعیتنی نظردن اوتکزیب، دولتگه تیگیشلی اچچیق حقیقتلرنی ایتیب اوتیب اوز موقفینی بو حقده اعلان قیلدی.
قورولتای نینگ ایشی آچیق و دموکراتیک فضاده آلیب باریلیب، برچه انتقاد و سواللر ایشیتیلدی، ایریملری قبول قیلینیب، ایریملریگه اصولی جوابلر بیریلدی.
قورولتایده کوپچیلیگی یاشلردن بولگن 9 کیشی باشقروو کینگاشی اعضالری صفتیده سیلنیب، اساسنامه و برنامه نینگ تعدیل بولگن قسملری تصویبدن اوتکزیلدی و قطعنامه نی صادر قیلیشی بیلن موفقانه اوز ایشینی توگتدی.
عزیز و حرمتلی ففتا اعضالری و دوستلری!
«ففتا» نینگ سایتی اونینگ قبول قیلینگن اساسنامه سی احکامیگه قرشی و برچه اخلاقی معیارلرگه خلاف بیرکیشی تماندن شخصی ملک صفتیده ایگللب آلینیب، برچه ففتانینگ عملی حیاتی، علمی وادبی فعالیتلریگه تیگیشلی بولگن متیریاللراوندن حذف قیلینیب، بیر انشعابی نشریه گه ایلنتیریلگندن سونگ، بیز (ففتا- افغانستان تورکلری مدنی فدراسیونی کوزگوسی) نامی بیلن اوشبو سایتنی آچیشگه قول اوردیک.
ینگی سایتیمیز ففتا نینگ اوزاق مدتلی عنعنه لرینی تیکله گن حالده، اونینگ برنامه سی اساسیده اوز نشراتینی یولگه قویه دی و افغانستان تورکلریگه اولرنینگ ملی ارمانلری کوزگوسی صفتیده خدمت قیله دی.
برچه افغانستان تورکلری قلمکش لریدن التماس ایته میز، ایلگریکی دیک اوز شعر و مقاله لرینی بیزگه یوباریب، ففتا سایتی نینگ سویه سینی ینه هم یوکسلتیریشگه یاردم بیرسینلر.
ففتانینگ باشقروو کینگاشی
