افغانستان تورکلری مدنی فدراسیونی ففتا نینگ اوچنچی

0
144

باشقروو هیئتی قراریگه کوره ففتانینگ اوچنچی قورولتایی 2017 ییل، دیسمبر آیی 25نچی کونی بلژیک اولکه سی باش کینتی بروکسل شهریده بولیب اوتدی.                                                                        جلسه باشیده دوکتور قمرالدین مصلح اوزاق یقیندن کیلگن اشتراکچیلرگه خیر مقدم ایتیب، قورولتای مناسبتی بیلن اولرنی تبریکله گندن کیین، مکروفوننی ییغیلیشنی آلیب باریش اوچون شاعر و یازووچی فرشته بیگیم ضیاییگه تاپشیردی.

بو تاریخی ییغیلیشده آلمان، اوتریش، ناروی، سویدن، بلژیک و تورکیه اولکه لری شهرلریدن کیلگن ففتانینگ نماینده لری اشتراک ایتدیلر. ویزه پرابلمی و باشقه بعضی بیر مشکللر سببلی افغانستان، امریکا، کانادا و ایریم اروپا مملکتلریدن کیلالمگن بیر قتار ففتا اعضالری و دوستلری تبریک سوزلری و بیرلیک پیاملری بیلن قورولتاینی قوتلب، ففتا بیلن بیرگه لیکلرینی اظهار ایتگن ایدیلر. اولر انترنیت آرقه لی کنفرانس جریانینی ایشیتیب جلسه بیلن اوز علاقه لرینی سقلب توردیلر.     امریکادن تنیقلی عالم پروفیسور دوکتور عنایة الله شهرانی و پیلوت رحمة الله «رحیمی»، سویدن دن بابر کلتوری انجمنی واستاد عبدالله تاشقین، سرپلدن دوکتورمحمد یعقوب واحدی، جوزجاندن ظهیر الدین محمد بابر انجمنی و یحیا حفیظی یوبارگن تبریکنامه لر و باشقه بیر قتار قوتلاو سوزلری اوقیب ایشیتیلدی. ففتا نامیگه کیلگن 40 دن آرتیق تبریکنامه لرده ایلیق قوتلاو سوزلری و ایزگوو ایستکلر بیلدیریلگن ایدی.

ییغیلیش ساعت 12 ده احمد امینی آرقه لی قرآن کریم آیتلری تلاوتی بیلن باشله نیب، کیچقرون ساعت 10 لرگه چه دوام ایتدی.

ییغیلیش باشیده خلقیمیز منفعتی یولیده ملی ارمانلر بیلن حیاتدن کوز یومگن صادق شخصیتلریمیز محمد طاهر بدخشی، شهرالله شهپر و مرحوم قیام الدین راعی برلاس و باشقه حیاتدن کوزیومگن و ملی غایه لر اوچون کورشکنلر روحلریگه حرمت بیلگیسی صفتیده بیر دقیقه لیک سکوت سقلندی.

سونگره قورولتای جلسه سینی آلیب بارووچی فرشته بیگم ضیایی برچه اشتراکچیلرگه خوش کیلدینگیز دیب، مجلس اجنداسینی اوقیب ایشیتتردی. اوندن کیین ففتانینگ علمی و فرهنگی مشاوری اکادمیسین عبدالحکیم شرعی جوزجانیدن اوز بیانیه سی بیلن ییغیلیشنی آچیب بیریشنی سوره دی.

استاد شرعی جوزجانی «مناجات» شعریدن بیر نیچه بیت اوقیگندن کیین «افغانستان تورکلری نینگ بیرلیگی تاریخی ضرورت» عنوانی بیلن یازیلگن معروضه سینی اوقیدی.

معروضه ده قورولتای نینگ تاریخی اهمیتی و ففتا بیرینچی بولیب بو تورکی اتمه نی ایشلتگنی ایسله تیب، اوچنچی قورولتای هم اوشه تاریخی عنعنه نینگ دوامی ایکنلیگی ایتیب اوتیلگن ایدی.

استاد جوزجانی تورکلر تاریخینی قیسقه چه انالیز قیلیب، شبهه سیز جهان تورکلری جمله دن بیز افغانستان تورکلری دنیانینگ اینگ متمدن و اوزیدن چیکسیز مادی و معنوی یادگارلیکلر قالدیرگن بویوک خلقلریدن بیری میز دیدی. او شرق اولکه لریده تورکی خلقلر 2000 ییلدن آرتیق حکمرانلیک قیلگنی حقیده مفصل معلومات بیریب اولرنینگ موفقیتلری، یرتگن مدنیتلری و انقراضلری نینگ اساسی عامللرینی تحلیل قیلدی.

جوزجانی خلقیمیزگه قبیله حاکملری تماندن قیلینگن وحشیانه ظلم و ستملرنی فاش قیلیب، اولرگه قرشی مشروطیت یولیدن کورشگن ملی سیمالریمیز امام بیردی اوزبیک، پروفیسور غلام محمد رسام، محمد کریم نزیهی، شونینگدیک بو یولده جانلرینی فدا قیلگن مرحوم طاهر بدخشی و شهرالله شهپرنینگ حرمت بیلن ایسله دی.

استاد جوزجانی، خلقیمیز بیدادگه قرشی آلیب بارگن کورشلری جمله سیده اوز بیک و تورکمن اوغلان لری، بشقه وطنداشلر بیلن طالبان بساطینی جمعلشده اوز ملی قهرمانلری، جمهور رئیس بیرینچی معاونی ستر جنرال عبدالرشید دوستم رهبرلیگیده خلق ارا اتفاقداش کوچلرگه غلبه یولینی تیکیسلب بیرگنینی ایضاحله دی.

اوندن کیین افغانستانده گی قلتس احوالگه اشاره قیلیب تاکیدله دی که اگر بیزلر اوزیمیزگه کیلیب بیرلیک سری قدم قویمسک و بیر مرکز اطرافیده ییغیلیشیب بیر کتته کوچگه ایلنمسک، البته که فاشیزم بوریلریگه ییم بولیشیمیز تورگن گپ.

آچیلیش سوزی توگه گندن سونگ ففتانینگ نوبتچی رئیسی انجنیر نجم الدین محمودی اساسی گزارش متنینی اوقیب ایشتتیردی. گزارشده ففتانینگ ایککنچی قورولتاییدن کیین جمعی رهبرلیک اساسیده تشکیلی و فرهنگی ساحه لرده رهبریت تمانیدن افغانستان و چیت اولکه لرده آلیب باریلگن فعالیتلر باره سیده مفصل معلومات بیریلیب، بیر قتار کمچیلیکلر کورسه تیب اوتیلدی.

گزارشده ففتا سایتی نشراتی ینگی بیر باسقیچگه کوتریلگنلیگی گه اشاره قیلینیب، فدراسیون نینگ کوزگوسی بولگن اوشبو سایتده ایچکی و تشقی حادثه لر کینگ مقیاسده یاریتیلیب، افغانستانده یوز بیریب تورگن فاجعه لی واقعه لر هر تمانله مه تحلیل قیلینیب، اولرنینگ اساسی سببلری و کوزلنگن مقصدلری کورسه تیب بیریلماقده. شونینگدیک ففتاده موجود بولگن ایریم کمچیلیکلر اوستیگه قول قوییلیب، اولرنی توغریلش یول لری کورسه تیلگن.

اوندن کیین فرشته ضیایی تورکیه دن تشریف بویورگن افغانستانلیک عالمه دوکتورعالیه ایلمازنی صحبتگه تکلیف قیلدی. تورکیه ده گی سلیمان دمیر ییل اونیویرستیتی استادی دوکتور عالیه ایلماز تورکیه ده عالی تحصیل اوچون کیلگن افغانستانلی محصل لر حیاتی و فعالیتی باره سیده سوز یوریتیب، اوزی نینگ رهبرلیگیده علمی ایشلر بیلن شغللنه یاتگن ستودینتلر حقیده صحبت قیلدی، ادبی و فرهنگی اویوشمه لرده خاتین- قیزلرنینگ سانی قانیقرلی ایمس دیب فکربیلدیردی.

اجنداگه کوره تبریک پیاملرینی اوقیش قسمی باشله نیب، پروفیسورعنایة عنایة الله شهرانی نینگ تبریک سوزی دوکتور قمرالدین مصلح تماندن و ستر جنرال عبدالرشید دوستم پیامی فرشته بیگم تمانیدن اوقیلدی.

شو اثناده افغانستان جمهور رئیسی بیرینچی معاونی ستر جنرال عبد الرشید دوستم نینگ آنلاین صحبت قیلیش اراده سیگه کوره مکروفون تیلفونگه اولندی و او کیشی بیر ساعتلیک مفصل صحبت دوامیده ففتانینگ اوچنچی قورولتایی بیلن همه اشتراکچیلرنی صمیمانه قوتله دی و آلیب بارگن فعالیتلرینی تقدیرلب، افغانستان نینگ سیاسی احوالی و دولت رهبرلری حقیده بیر قتار ایتیلمگن واقعلیکلرنی ایتیب، خلق و وطنگه قرشی آلیب باریله یاتگن اماجلرنی کورسه تیب اوتدی(صحبت متنی سایتلر و فسبوکلرده موجود).

اوندن کیین محمدالله وطندوست سوزگه نوبت آلیب بیر قتار انتقادی فکرلرینی بیلدیردی. بو انتقادلرنینگ ایریملری قبول قیلینیب، قالگنلریگه قانیقرلی جوابلر بیریلدی.

شو ترتیبده جلسه نینگ بیرینچی قسمی توگه دی و مهمانلر اوقت تناول قیلیشگه تکلیف قیلیندی.

 

طعام صرفیدن سونگ جلسه نینگ ایکینچی قسمیگه اوتیلیب، آجنده گه موافق باشقروو هیئتی نی سیلش جریانی باشلندی و ففتا رهبریتی تامانیدن ایکینچی قورولتایده قبول قیلینگن اساسنامه گه موافق بو مقامگه کاندید ایتیلگن 9 کیشی معرفی ایتیلدی. موضوع بوییچه اعتراض بیلدیرگن حرمتلی محمدالله وطندوست و محترم محمد صدیق اکبری نینگ سوال و اعتراضلریگه جواب بیریلگندن کیین، بو اورینلرگه اوزلرینی کاندید قیلیشگه داوطلب بولگن کیشیلر اوزلرینی معرفی قیلسینلر دیب سوره لدی. هیچ بیر داوطلب بولمگنی اوچون قورولتای اعضالری رأی بیریشگه تکلیف قیلیندی و بیر آواز بیلن قوییده گی 9 کیشی افغانستان تورکلری مدنی فدراسیونی باشقروو هیئتی اعضالری صفتیده سیلندیلر:

ــ اتریشدن انجنیر نجم الدین محمودی نوبتچی رئیس صفتیده؛

ــ مونشن- الماندن  انجنیر محمد عثمان بیلیم، تشکیلات مسئولی صفتیده؛

ــ سویدن دن فرشته بیگیم ضیایی مدنی (فرهنگی) ایشلر مسئولی صفتیده؛

ــ تورکیه دن دوکتورعالیه ایلماز، خاتین – قیزلرایشلری مسئولی صفتیده؛

ــ امریکادن رحمة الله پیلوت «رحیمی»، امریکا بوییچه تشکیلات مسئولی صفتیده؛

ــ افغانستان دن محمد هاشم همدم، اولکه بوییچه تشکیلات مسئولی صفتیده؛

ــ آلماندن احمد امینی، ارتباط  کمیسیونی مسئولی صفتیده؛

ــ دنمارک دن جمشید وطندوست، یاش ییگیتلر کمیسیونی مسئولی صصفتیده؛

ــ بلژٰیکدن نیک محمد مرادی، مالی و اقتصادی ایشلر مسئولی صفتیده.

ایکنچی قورولتایده تصویب ایتیلگن و کیین اولرده تعدیل و اوزگریشلر کیریتیلگن ففتانینگ اساسنامه سی استاد بسم الله (توردیقل میمنگی) آرقه لی و برنامه سی فرشته ضیایی آرقه اوقیب ایشیتیلدی.  تعدیللر بوییچه بحث یوریتیلیب، آوازگه قوییلدی و قورولتای نینگ برچه اعضالری بیر آواز بیلن اولرنی تصدیقله دی.

استاد بسم الله میمنگی بیر دقیق صحبت ضمنیده آخرگی دورلرده جهان و امریکاده یوز بیرگن اوزگریشلر و قبیله حاکمیتی تامانیدن افغانستان تورکلری حقیده استعمارچیلرحمایه سی بیلن عملگه آشیریلگن تورلی ظالمانه سیاست بوییچه مستند معلوماتلر اساسیده مفصل سوز یوریتیب، بو آغیر احوالدن چیقیش اوچون برچه اولکه تورکلری بیرلشیب کورش آلیب باریشلری ضرور لیگینی تاکیدله دی.

قورولتای ییغیلیشی دموکراتیک بیر محیط ده، هر کیم ایرکین سوزلب اوز فکر و نظرینی آچیق فضاده بیان ایتیب، انتقادی ملاحظه لرینی اورته گه تشلش امکانیگه ایگه بولگن فضاده، بولیب اوتدی. برچه سوال و انتقادلرگه منطقی و مستدل جوابلر بیریلیب، یوز بیرگن ایریم کمچیلیکلر قبول قیلیندی.

اوندن سونگ قورولتای قطعنامه سی قبول قیلیندی.

سونگره دوکتور قمرالدین مصلح قورولتای جلسه سی جریانیده اوقیلگن مقاله لر، قیلینگن صحبتلر و بیلدیریلگن فکرلر اوستیده توخته لیب اوتیب برچه سینی ایجابی بهاله دی و قورولتای بیر دموکراتیک روحیه ده اوتگنلیگینی تاکیدله دی.

قورولتای جلسه سی، فرشته ضیایی آرقه لی کمال موفقیت بیلن آلیب باریلیب، کیرکلی ایضاحلر و قیزیقرلی شعرلر بیلن اشتراکچیلر دقتینی تارتیب توردی. او بو موفقیت بیلن برچه نی تبریکلب، قورولتای جلسه سی موفقیت بیلن توگه گنینی اعلان قیلدی.

جلسه جریانی المانیه دن کیلگن ففتاچی غلام نبی حیدری آرقه لی ایفیرگه اوزه تیلدی (برودکاست قیلیندی) وفوتولرنی آلیشده وحید وطندوست هم یاردم کورستدی.

راپورتر«یبغو»

پاسخ ترک

Please enter your comment!
Please enter your name here